„საქართველოს ვარსკვლავის" 16 წლის კონკურსანტმა 38 კგ დაიკლო - რჩევები და მოტივაცია ნათია ნანობაშვილისგან

„ყოველი დილა უარყოფითი ემოციებით იწყებოდა, რადგან ვიცოდი, სკოლაში უნდა წავსულიყავი.
ვიჯექი მარტო, არავისთან კონტაქტი არ მქონდა და ერთი სული მქონდა, გაკვეთილები მალე დამთავრებულიყო“, - ეს პროექტ „საქართველოს ვარსკვლავის“ ასაკით პატარა, თუმცა დიდი გამოცდილების გოგონას, ნათია ნანობაშვილის სიტყვებია. კარიერას ახლა იწყებს, მანამდე კი ბულინგისთვის თავის დაღწევა და ჭარბ კილოგრამებთან ბრძოლა მოუწია. ნათიამ MARAO.GE-ს თავისი ამბავი მოუყვა და გამოცდილებაც გაუზიარა:


- წონაში აქტიური მატება დაიწყო 4 წლის წინ და 14 წლის ასაკში უკვე 125 კილოგრამს ვიწონიდი. გამომდინარე იქიდან, რომ ამ ასაკის ბავშვისთვის
ძალიან რთულია ნებისყოფის გამოჩენა და შეზღუდვების თვითნებურად დაწესება, გადავწყვიტეთ, ენდოკრინოლოგისთვის მიგვემართა. ასეთ შემთხვევაში მეტ პასუხისმგებლობას ვიგრძნობდი და საჭმელსაც მარტივად შეველეოდი. 1 წლის განმავლობაში დავიკელი 38 კილოგრამი.



რა თქმა უნდა, მქონდა სუსტი მომენტებიც და ვარღვევდი დიეტას, მაგრამ ამას სისტემატური სახე არ ჰქონია. ჩემი დიეტა იყო გამოკვლევების შედეგად დანიშნული და მორგებული ჯანმრთელობის მდგომარეობაზე. შეძლებისდაგვარად ვიკვებებოდი საათობრივად, მაქსიმალურად ჯანსაღი პროდუქტებით. მაგალითად: უმარილოდ მოხარშული ხორცი, ნებისმიერი სახის ბოსტნეული, მოხარშული კვერცხი, ხილი (გარდა ყურძნისა, კარალიოკისა და ლეღვისა) და რძის პროდუქტები (გარდა არაჟნისა). ჩემი წონის შესაბამისად, დღეში 4 ლიტრ წყალს ვსვამდი და ფეხით გავდიოდი 10 კილომეტრს. თავიდან ძალიან მიჭირდა უმარილო და უგემურ საჭმელთან შეგუება. ამიტომ გადავწყვიტე, მოტივაციის შესანარჩუნებლად რაღაცნაირად გამეგემრიელებინა კერძები, ამისთვის კი სოიოს სოუსს ვიყენებდი და რაც მთავარია, არ ვშიმშილობდი. ვფიქრობ, ამაზე ცუდს ვერაფერს გავუკეთებთ ორგანიზმს.

როგორ ებრძოდი სურვილებს, რა იყო შენი საიდუმლო?

- ჩემი დიეტის განმავლობაში არაერთი სუფრა გაშლილა ჩემს ოჯახში. ასევე, მეც ვხვდებოდი ისეთ სიტუაციებში, რომლებიც დარღვევისკენ მიბიძგებდნენ. ვცდილობდი, თავი ამერიდებინა დაბადების დღეებისთვის და ქორწილებისთვის, მაგრამ ვაცნობიერებდი, რომ ასე საზოგადოებისგან გარიყულად ვიგრძნობდი თავს. ბევრჯერ მიტირია კიდეც ამის გამო. დიეტის დაწყებიდან მალევე მივხვდი, რომ ბედნიერებისთვის გემრიელი არომატიც კი მყოფნიდა, მხოლოდ სუნითაც ვკმაყოფილდებოდი. კარგი გურმანი კარგი მზარეულიც აღმოვჩნდი და რაც უნდა უცნაური იყოს, გადავწყვიტე, ოჯახისთვის კერძები მე მომემზადებინა. მივხვდი, რომ ჩემ მიერ მომზადებულის გასინჯვისას მიღებული დადებითი ემოციები ძალიან მიმარტივებდა საქმეს. ასევე სწორედ ამ მიზნით ოჯახში ასეთი გადაწყვეტილება მივიღეთ, რომ ყოველ დაკლებულ 6 კილოგრამზე განვაახლებდი ჩემს გარდერობს. ის ფაქტი, მაღაზიებში ყოველი ვიზიტისას ჩემი წონისთვის შესაფერისი არჩევანი უფრო და უფრო რომ ფართოვდებოდა, დანებების და დიეტის შეწყვეტის საშუალებას ნამდვილად არ მაძლევდა.



მანამდე რა გაძლევდა მოტივაციას, თუ შეგიძლია კონკრეტული ამბები მოგვიყვე, რამაც დიეტის დაწყებისკენ გიბიძგა?

- რა თქმა უნდა, მთავარი მოტივაცია ჯანმრთელობა იყო. ბევრი მესმოდა და ბევრსაც ვკითხულობდი იმის შესახებ, თუ რამხელა ზიანს ვაყენებდი ჩემი ზედმეტი კილოგრამებით ორგანიზმს. მოტივაციისთვის ვათვალიერებდი იმ ადამიანების ფოტოებს, რომელთა ბრძოლა ჭარბ წონასთან შედეგიანად დასრულდა.
მახსოვს ერთი შემთხვევა: ერთ-ერთი მნიშვნელოვანი დღისთვის კაბას ვეძებდი. მაღაზიებში უშედეგოდ სიარულის შემდეგ, დაღლილი და გაღიზიანებული მაინც იმედიანად შევედი ერთ-ერთ მაღაზიაში, რომელშიც მომუშავე კონსულტანტმა დამცინავად მითხრა, რომ ჩემი ზომის ტანსაცმელი მათ მაღაზიაში არასდროს არ იყო და არც იქნებოდა. აი, სწორედ მაშინ გავბრაზდი საკუთარ თავზე და გადავწყვიტე, რომ თუ სხვებმა შეძლეს, ესე იგი, ჩემი მიზანი არ იყო არარეალური და მე ამას აუცილებლად შევძლებდი.

მიზანთან ძალიან ახლოს ვარ. ამ პერიოდის განმავლობაში ძალიან ბევრ რამეზე დავფიქრდი, პრიორიტეტებიც გადავაფასე და მივხვდი, რომ ზედმეტი წონა ჯანმრთელობას ვნებს და არა სილამაზეს. მე უბრალოდ ვერ შევძელი 125-კილოგრამიანი ნათიას შეყვარება, რამაც გამოიწვია ფსიქოლოგიური პრობლემები. ბუნებრივია, პირველ რიგში, თავად უნდა სცე საკუთარ თავს პატივი, რომ გარშემომყოფებისგანაც იგივე იგრძნო. მე ვფიქრობ, რომ უნაკლო და ყველასათვის იდეალური ადამიანები არ არსებობენ. ასევე მგონია, რომ ადამიანების აგრესიისა და უსამართლო ქმედებების უკან მათი ფსიქოლოგიური ტრავმები დგას. მე ვიტყოდი, დავფიქრდეთ, დავუფიქრდეთ ჩვენს ყოველ სიტყვასა თუ ქმედებას და არათუ განზრახ, ვეცადოთ, გაუაზრებლად და დაუფიქრებლადაც ნუ მივაყენებთ ერთმანეთს ფიზიკურ თუ მენტალურ ზიანს.


რას ეტყოდი მათ, ვინც ახლა იგივე გზას გადის, რაც შენ გაიარე, როგორ გაამხნევებდი?

აბსოლუტურად ყველაფერია შესაძლებელი, თუ არსებობს მიზანი. ძლიერი სურვილის შემთხვევაში შეუძლებელი არაფერია. მთავარია, გვქონდეს საკუთარი თავის რწმენა და იმედი. პირადი გამოცდილებით ვამბობ, რომ საოცარი გრძნობაა, როდესაც საბოლოოდ ვდგავარ სარკის წინ და ვგრძნობ, რომ აშკარად მომწონს საკუთარი თავი და ვამაყობ ჩემი გამძლეობით. მხოლოდ ამ წამებისთვის ღირდა ეს 1 წელი. ასევე გეტყვით, რომ დიეტისთვის გამომუშავებული ნებისყოფა ჩემ მიერ წამოწყებულ სხვა საქმეებშიც მნიშვნელოვანი აღმოჩნდა და ძალიან მეხმარება ახლაც. ამიტომ, არ შეუშინდეთ პრობლემებს და მუდმივად გახსოვდეთ, რომ თქვენ ეს შეგიძლიათ!

სიმღერის კონკურსში აქამდე თუ მიგიღია მონაწილეობა, რა არის „საქართველოს ვარსკვლავი“ შენთვის? სამომავლოდ რა გეგმები გაქვს ამ მხრივ?

- ხშირად მიფიქრია, რა იქნებოდა ჩემი ცხოვრება სიმღერის გარეშე და ასეთ შემთხვევაში მხოლოდ შავ-თეთრი, უსიცოცხლო, ჩამქრალი და უინტერესო კადრები მიდგება თვალწინ. სიმღერის აკადემიურ დონეზე შესწავლა 6 წლის წინ დავიწყე ხათუნა ლეჟავასთან, რომელსაც რთულია, უბრალოდ ვოკალის პედაგოგი ვუწოდო, რადგან ის ჩემთვის მთავარი მოტივატორი და ფაქტობრივად, დედობილია. სწორედ ამ წლების მუშაობამ გადამაწყვეტინა, რომ ჩემი მომავალი პროფესიაც და მთელი ცხოვრებაც სიმღერას დავუკავშირო, გეზი კი ბერკლის კოლეჯისაკენ მაქვს აღებული და ამის მისაღწევად ბევრს ვმუშაობ.
„საქართველოს ვარსკვლავი“ ჩემთვის პირველი პროექტია, აქამდე არც ერთ სიმღერის კონკურსში არ მიმიღია მონაწილეობა. ამ პროექტში მონაწილეობა ჩემთვის ძალიან მნიშვნელოვანია გამოცდილების თვალსაზრისით. ბედნიერი ვარ, რომ პროფესიონალებთან მუშაობის შესაძლებლობა მეძლევა და ვფიქრობ, სწორედ „საქართველოს ვარსკვლავი“ დამეხმარება კომპლექსების გადალახვაშიც და ვიცი, რომ თავდაჯერებულობაც მომემატება, რაც ამ სფეროში წარმატების მიღწევისთვის აუცილებელია. გულით მჯერა, რომ ეს პროექტი არის გზა ახალი, ფერადი, ძალიან საინტერესო და საოცნებო ცხოვრების დასაწყისისკენ...


FaceBook ბეჭდვა
კომენტარები / 0 /
კომენტარი ჯერ არ გაკეთებულა
loadign_gif
გამოკითხვა
რომელ კატეგორიას ნახულობთ ყველაზე ხშირად?
არქივის კალენდარი