იტყვით, თმის ფენით გაშრობას რა ცოდნა უნდაო? მართალი ხართ, მხოლოდ გაშრობას არ სჭირდება დიდი ფილოსოფია, მაგრამ თუ გსურთ, თმას სალონში დავარცხნილის იერი ჰქონდეს, რამდენიმე წესის ცოდნა გამოგადგებათ.
გაინაწილეთ თმა სექციებად. გამოიყენეთ ან პარიკმახერის სარჭები, ან ჩვეულებრივი თმის სამაგრები და დაიმაგრეთ თითოეული ნაწილი. დაიწყეთ თითოეული სექციის ცალ-ცალკე გაშრობა. ფენის სპეციალური სავარცხლით თმის მონაკვეთები კარგად მოქაჩეთ და თან ფენის ცხელი ჰაერი მიაყოლეთ. ფენი 10 სმ-ზე ახლოს არ დაიკავოთ თმასთან. ასე უფრო სწრაფადაც გაიშრობთ თმას და ვარცხნილობაც უკეთესი გამოგივათ.
დაჯექით, მიუხედავად იმისა, თუ მიჩვეული ხართ აბაზანაში თმის გაშრობას ფეხზე მდგომი. პროფესიონალები გვირჩევენ, მოხერხებულად მოვთავსდეთ სკამზე და ყველა საჭირო ნივთი იქვე დავილაგოთ – ასე არც დავიღლებით და თმასაც უფრო სწრაფად და ეფექტურად გავიკეთებთ.
სავარცხელი მარჯვენა ხელში დაიკავეთ (თუ, რა თქმა უნდა, ცაცია არ ხართ). სავარაუდოდ, ქალების უმეტესობა მიჩვეულია ფენის მარჯვენა ხელში ჭერას, ხოლო სავარცხლისას – მარცხენაში. შეუცვალეთ მათ ადგილები – და თმის დაყენება ბევრად მოსახერხებელი იქნება.
გაშრობისას თმის თითოეული სექცია სავარცხლის მეშვეობით ასწიეთ ძირებიდან მაღლა – ასე ვარცხნილობას დამატებით მოცულობას მიანიჭებთ.
ყოველთვის გამოიყენეთ ფენის კონცენტრატორი-თავი (უმჯობესია, თუ ის წვრილპირიანი იქნება) იმისათვის, რომ ფენიდან გამოსული ჰაერი თმის ზრდის პარალელურად მიემართოს, ძირებიდან ბოლოებისკენ. წინააღმდეგ შემთხვევაში, ცხელი ჰაერი თმას გააფუებს და ის დაუმორჩილებელი და უფორმო იქნება.
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას,სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.
