„წლების განმავლობაში მისი შუამდგომლობით 126 ადამიანი გადაურჩა ციხესა და დახვრეტას“ - მედეა ჯაფარიძის უცნობი ისტორია - Marao

მედეა ჯაფარიძე - ქართველი მსახიობი, საქართველოს სახალხო არტისტი, თბილისის საპატიო მოქალაქე, მწერლისა და საზოგადო მოღვაწის, რევაზ თაბუკაშვილის მეუღლე. ის 1994 წელს 71 წლის ასაკში გარდაიცვალა, თუმცა მედეა ჯაფარიძის სახელი უკვდავია, მის მიერ შესრულებული როლები კი - დაუვიწყარი.

კოტე მარჯანიშვილის თეატრის სცენაზე მან შექმნა არაერთი უბრწყინვალესი სახე, რომლებიც ოქროს ასოებით ჩაიწერა ქართული თეატრის უმდიდრეს ისტორიაში. მათგან აღსანიშნავია: ნინა (მიხეილ ლერმონტოვის „მასკარადი“), ჯულიეტა, ბეატრიჩე, ლედი ანა (უილიამ შექსპირის „რომეო და ჯულიეტა“, „ჭირვეული ცოლის მორჯულება“, „რიჩარდ III“), ჭრიჭინა (მარიკა ბარათაშვილის „მარინე“), გულსუნდა (ვაჟა-ფშაველას „მოკვეთილი“), მარტა (კასონას „ხეები ზეზეულად ხმებიან“), ვარვარა კარპოვნა (კიტა ბუაჩიძის „ეზოში ავი ძაღლია“), გულქანი (პოლიკარპე კაკაბაძის „კახაბერის ხმალი“), იოკასტე (სოფოკლეს „ოიდიპოს მეფე“), დედა (ლაშა თაბუკაშვილის „ძველი ვალსი“) და სხვ.

მისი წარმატებების პარალელურად, საინტერესოა მედეა ჯაფარიძის პირადი ცხოვრებაც. ბევრს არ ეცოდინება, რომ უმშვენიერესმა მსახიობმა საკუთარ გვარზე უარი თქვა და დედის გვარი მიიღო. მისი მამა, ვალერიან მაჭავარიანი, მენშევიკი იყო. სწორედ ეს გახდა მიზეზი იმისა, რომ მედეამ დედის გვარის ტარება ამჯობინა.

როგორც ცნობილია, მედეას მამა ემიგრირებული იყო, საბჭოთა კავშირის შექმნის შემდეგ კი საფრთხის ასარიდებლად ის დედის გვარზე ოფიციალურად გადავიდა. თავად ყოველთვის ამბობდა, რომ დედა ძალიან უყვარდა და ეს გადაწყვეტილება ამიტომ მიიღო, სიმართლე კი მხოლოდ საბჭოთა კავშირის დაშლის შემდეგ გახდა ცნობილი.

მედეა ჯაფარიძის სიკეთეს არ ჰქონდა საზღვრები. ერთი პერიოდი უმაღლესი საბჭოს დეპუტატად აირჩიეს. წლების განმავლობაში მისი შუამდგომლობით 126 ადამიანი გადაურჩა ციხესა და დახვრეტას. ვინ დაუდგებოდა წინ მის კეთილ ნებას?! ალბათ, უფრო იმიტომ, რომ მედეა ჯაფარიძისგან ასხივებდა ისეთი რაღაც, რასაც სხვაში ვერ იპოვიდი და ეს "რაღაც" მისი პიროვნების მარკერი იყო! დეპუტატად მეორედ აღარ აირჩიეს. ხუმრობდნენ: ციხეში პატიმარი აღარ დაგვიტოვაო! მხოლოდ მას შეეძლო ეთხოვა გენერალური პროკურორისთვის პოლიტპატიმრის გათავისუფლება, ებრძოლა და მოეთხოვა ყველაფერი, რაც კი სხვას სჭირდებოდა...