მსახიობი ნინო ლეჟავა რადიოს ფორტუნას რუბრიკის სტუმარია, სადაც პროფესიასა და პირად ცხოვრებაზე საუბრობს:
"ვფიქრობ, რომ ყველაზე რთული უსაქმურობაა - ძალიან რთულია არაფრის კეთება. კახეთისკენ მაქვს შეძენილი ბინა, ძალიან მიყვარს იქაურობა. ოჯახით რომ წავედი, ყურძნის კრეფა დავიწყე. ძალიან კარგი დრო გავატარე.
ბინა არც ახლა არ მაქვს. არ გავჩერდები, ყველაფერს გავაკეთებ, რომ ჩემი ბინა მქონდეს. მარტო საქართველოში შეიძლება მუშაობდე რამდენიმე ადგილას და მაინც ახალს ეძებდე.
ხშირად მითამაშია ისეთი ქალის როლი, რომელიც არ მიყვარს, მაგრამ ყველა როლი ჩემთვის გამორჩეულია.
ჩემი პრინცი ცხენით არ დადის, ფეხით დადის. მიხარია, რომ არანაირი წინააღმდეგობა არ მხვდება, იმიტომ რომ რეჟისორია“ - ამბობს მსახიობი ნინო ლეჟავა.
ნინო ლეჟავა თეატრისა და კინოს მსახიობია. დაამთავრა შოთა რუსთაველის სახელობის თეატრისა და კინოს ინსტიტუტის სამსახიობო ფაკულტეტი, 1997 წელს.
წარმატებული კარიერის მქონე მსახიობი ამასთანავე, 4 ბიჭის დედაა.
"90-იანებში ადამიანებს უმეტესად ფინანსური პრობლემები ჰქონდათ და უცხოეთში წასვლის მიზეზიც უმეტესად ეს იყო. იმ გადაცემაში მაშინ ეს სიტუაცია ვამხილე, ვთქვი, - რომ ჩვენს ქვეყანაშიც შეიძლება საქმის პოვნა-მეთქი. მაშინ ჩემს ტელეფონზე ზარები გაისმა, არ იყო კარგი საქციელიო - მითხრეს. აბსოლუტურად მშვიდად, სითბოთი და სიყვარულით ვუპასუხე - ვისაც ჩემი მეგობრობის და ნათესაობის რცხვენია, ეს მათი პრობლემაა-მეთქი... არ ვთვლი, რომ ცხოვრებაში ამ ჩემი სხვადასხვა ადგილას დასაქმებით რამე წავაგე, პირიქით.
დღემდე ეს პოზიცია მაქვს და შვილებსაც მაგალითს ვაძლევ, ვეუბნები - სულ რომ მილიონერი გავხდე, საკუთარი შრომით მოპოვებული გროშების გემო უნდა იცოდეთ-მეთქი... ამაყი ვარ, რადგანაც ჩემი უფროსი ვაჟი, რომელიც ასევე მსახიობია (დღემდე თეატრში ვერ მოეწყო, მე კიდევ არ ვარ ის კატეგორია, თეატრები თხოვნით ჩამოვიარო - შვილი დამისაქმეთ-მეთქი), ერთ-ერთ კომპანიაში თავისით დასაქმდა. ძალიან კმაყოფილია და მადლობა კომპანიას ამ შესაძლებლობისთვის. თუმცა მანამდე იქ ჯერ პრაქტიკა, მერე ტესტირება გაიარა. მეორე შვილი არასრულწლოვანია, რომელიც ყველა წესის დაცვით, რის უფლებაც აქვთ არასრულწლოვნებს, მუშაობს. ჩემი 13 და 11 წლის შვილები კი, საამისოდ ჯერ პატარები არიან, მაგრამ ჩემი და მათი უფროსი ძმების მაგალითი მათზე კარგად იმოქმედებს..." - ამბობდა მსახიობი ერთ-ერთ ინტერვიუში.