მოდელი ლიკა კვარაცხელია სოციალურ ქსელში კერძების რეცეპტებს ხშირად აზიარებს. ამჯერად ის ხაჭოს პასკის რეცეპტს აქვეყნებს:
მომზადება:
1. შოკოლადი გავადნოთ ორთქლის აბაზანაზე, დავამატოთ საკვები საღებავი სასურველი ფერის მისაღებად და ჩავასხათ ფორმაში. მაცივარში შევდგათ გასამაგრებლად.
2. კვერცხის მასა კვერცხის გულები, ნაღები, ვანილი და შაქარი მოვათავსოთ ქვაბში და მუდმივად ვურიოთ. ავადუღოთ და 30-40 წამის შემდეგ გადმოვდგათ ცეცხლიდან. გავაციოთ.
3. კენკრის ფენა კენკრას მოვაყაროთ შაქარი, წამოვადუღოთ და დავამატოთ სახამებელი, რომ მასა შესქელდეს. გავაციოთ.
4. ხაჭოს მასა ხაჭო საცერზე დავტოვოთ 3-4 საათით, რათა ზედმეტი სითხე ჩამოიწუროს. შემდეგ ბლენდერში მოვათავსოთ კარაქთან ერთად და 3-4 წუთის მანძილზე ვთქვიფოთ, ერთგვაროვანი მასის მიღებამდე. ჩავამატოთ გაგრილებული კვერცხის მასა და კარგად ავურიოთ.
5. შეკრება მზა ხაჭოს მასა მოვათავსოთ შოკოლადის ფორმაში, დავამატოთ კენკრის ფენა და ზემოდან ისევ ხაჭო. გავიმეოროთ 2 ან სამჯერ. დავადოთ თეფში და შევდგათ მაცივარში მთელი ღამით.
Voilà! დილით მაცივარში ულამაზესი და არომატული ხაჭოს პასკა დაგხვდებათ, რომელიც საოცრად ნაზია შიგნიდან და ხრაშუნა შოკოლადის გარსითაა გაფორმებული. მიირთვით სიამოვნებით!
"როგორ გავიცანი ჩემი მეუღლე? - მკითხეს ერთ-ერთ ინტერვიუში. აქ მოვყვები: იყო ასეთი მაღაზია "ჩირაღდანი“, სადაც ოპტიკური სათვალეები იყიდებოდა. ერთ დღეს დედასთან ერთად შევისეირნე სათვალის შესაძენად. ამ დროს, იქვე 27 წლის სპორტსმენიც დასეირნობდა, რომელმაც შემამჩნია და შორიდან მოვეწონე. თბილისში იშვიათად იყო, სანაკრებო პერიოდში ჩამოდიოდა ხოლმე. გაზეთების კითხვა უყვარდა, ახლაც უყვარს. მოკლედ, მეორე დილას გაზეთი "მერიდიანი“ რომ შეიძინა, გადაშალა, ჩემი დიდი ინტერვიუ შეხვდა (1995 წელი იყო ალბათ), სადაც დეტალურად ეწერა, ვინ ვარ, რამდენი წლის ვარ, მგონი, მისამართიც კი ეწერა. ცხადია, ძალიან მარტივად მიპოვა და გამეცნო.1997 წელს კი დავქორწინდით" - იხსენებდა ლიკა.
მეუღლის გაცნობაზე ერთ-ერთ ინტერვიუში მურთაზ შელიაც საუბრობდა:
"ალბათ, ჩემს "სპრინტერულ ქორწილზე“ განაცხადი რომ შემეტანა, "გინესის რეკორდებშიც“ მოვხვდებოდი... ჩემი მეუღლე ლიკა კვარაცხელია სამოდელო სააგენტო "ნატალის“ გამორჩეული სახე იყო. შეგვიყვარდა ერთმანეთი, მაგრამ მაშინ ინტერნეტი არ იყო და მხოლოდ ტელეფონით ვურთიერთობდით. მაშინ "მანჩესტერ სიტიში“ ვთამაშობდი. მწვრთნელს ვთხოვე, ვიცი 2 დღეში ბირმინგემში თამაში გვაქვს, მაგრამ სხვაგვარად არ გამოვა, ცოლის მოყვანა მინდა და საამისოდ 10 საათს თუ მომცემთ-მეთქი. მწვრთნელი გაოცდა, მაგრამ დამთანხმდა. ლონდონი–თბილისის ავიარეისით ჩამოვფრინდი, გამთენიის 6 საათზე, 7-ის ნახევარზე ხელი მოვაწერეთ, 7 საათზე ქორწილი დაიწყო და 12 საათზე მე და ლიკა უკან, თბილისიდან ლონდონში გავფრინდით. მწვრთნელმა ეს რომ გაიგო, გაოცდა, გაზეთებმა დაწერეს, შელიამ 5 000 კმ იფრინა და მანჩესტერში 10 საათში ახალმოყვანილი ცოლით დაგვიბრუნდაო..."
ლიკა კვარაცხელიას, სამი შვილი: დათუნა, ელენე და ანა შელიები ჰყავს. ანა უკვე დაოჯახებულია მორაგბე ლაშა ლომიძეზე და მათ ორი შვილი შეეძინათ. ანა მშობლებისგან შორს ცხოვრობს, თუმცა ლიკა ბებიის ამპლუით მაინც ტკბება და, როგორც თავად ამბობს, შვილიშვილები აძლევენ მოტივაციას, მუდმივად ფორმაში იყოს.