მძიმე, სველი, არომატული: პასკის სამი საუკეთესო რეცეპტი - Marao

აღდგომის დღესასწაულის მოახლოებასთან ერთად, აქტუალურია სანდო და ნაცადი პასკის რეცეპტის პოვნაც:

ბარბარე ჯორჯაძის რეცეპტი:

 ბარბარე ჯორჯაძე არის ხელოვანი და ქართული სამზარეულოს რევოლუციონერი, რომელმაც ერთ წიგნში მოაქცია საქართველოს ყველა კუთხის მრავალეროვნული კულინარია; გვასწავლა ევროპული კერძების, გამასპინძლების, სუფრისა და ჭურჭლის გაწყობის წესების თანმიმდევრობა; წინ წამოსწია პროდუქტის სიჯანსაღის ცნება და მისი ღირებულება. მისი რეცეპტები დღესაც დიდი პოპულარობით სარგებლობს და უამრავი დიასახლისი სწორედ ბარბარეს წიგნიდან ხელმძღვანელობს.

“ერთი ფუთი ფქვილი გასცერით, გირვანქის სამი-მეოთხედი ხმელი და ახალი დროჟი გახსენით ნელ-თბილ წყალში, ფქვილი იმდენი მოუკიდეთ, რომ მაწვნის სისქე გახდეს. თავი დახურეთ, თბილ ალაგას დადგით.

ოცდაათი კრუჟკა რძე ქაფქაფით ჩაასხით დეშკაში, ან რაშიაც ცომს მოზილამთ, ცოტ-ცოტა ფქვილი ჩააყარეთ თან ურიეთ, რომ ზმულტლები გაიშალოს, ფქვილი იმდენი უნდა მოუკიდოთ, სანამ მაწვნის სისქე გახდება.

როცა განელდება და ნელთბილიღა იქნება, მაშინ ეს დროჟი ჩაასხით, მოურიეთ და კარგად დახურეთ, თბილ ალაგას დადგით სანამ კარგად გაგუვდება და ნახევრამდე ამოვა.

მანამ 150 კვერცხის გული 12 ან 14 გირანქა დანაყილ და გაცრილ შაქარში ისე ძალიან კარგად გათქვიფეთ რომ გათეთრდეს.ცომი როცა გაფუვდება ეს გათქვეფილი კვერცხი შიგ ჩაასხით და კარგა მოურიეთ, დანარჩენი ფქვილიც ჩააყარეთ, ოღონდ სულ კი არ ჩააყაროთ, ფქვილი მოანარჩუმეთ, კარგად აურიეთ, თბილად დახურეთ და თბილ ალაგას დადგით, რომ კიდე გაფუვდეს.

როცა გაფუვდება 5 გირვანქა კარაქი გაადნეთ, გაწურეთ და თბილი დაასხით - 2 რუმკა რომი, დანარჩენი მასალაც ჩააყარეთ: ილი დანაყილი ათიოდე, ნახევარი ჯავზი, 20 წვეთი ლიმონის ზეთი, 2 სტოლის კოვზი მარილი, ან კიდე სხვა მასალა რაც გნებავთ.

შემდეგ დაზილეთ ძალიან, სამი საათი უნდა ზილოთ, ცომის დაზელაზედაც არის დამოკიდებული კარგი პასკის გამოცხობა, მერე თბილად დახურეთ, ალაგას დადგით.როცა კიდევ კარგად გაფუვდეს და კარგად იმატოს, ფორმას წაუსვით ერბო, მოაყარეთ სუხარი, ცომი ჩადეთ ფორმაში ერთი მესამედი ფორმის, ნახევრად რომ ამოვიდეს ფეჩი გაახურეთ და როცა ერთი მეოთხედი აკლდეს ფორმას, მაშინ შედგით ფეჩში.

ერთი საათი და ნახევარი უნდა იდგეს ფეჩში. პატარა ჩხირით გასინჯეთ-თუ ჩხირს ცომი გამოჰყვა, აკლია გამოცხობა და თუ მშრალია ჩხირი-ეყოფა.ვისაც ამდენის გამოცხობა არა სურს, გაყოს შუაზე.

მასალად საჭიროა: ფქვილი - ერთი ფუთი, რძე - 24 კრუჟკა, რომი - 2 რუმკა, ილი - 10 დანაყილი, ჯავზი - ნახევარი დანაყილი, დროჟი - გირვანქის სამი მეოთხედი, შაქარი - 12 გირვანქამდე, კარაქი - 5 გირვანქა, ლიმონის ზეთი - 20 წვეთი, მარილი 2 სტოლის კოვზი, კვეცხი - 130.

ლიკა კვარაცხელიას ხაჭოს პასკა

1. შოკოლადი გავადნოთ ორთქლის აბაზანაზე, დავამატოთ საკვები საღებავი სასურველი ფერის მისაღებად და ჩავასხათ ფორმაში. მაცივარში შევდგათ გასამაგრებლად.

• "თუ პასკა გიხმება და არ იცი, რა ქნა, მე გასწავლი, როგორ მოიქცე" - ნუცა სურგულაძის ახალი და მარტივი რეცეპტი 

2. კვერცხის მასა კვერცხის გულები, ნაღები, ვანილი და შაქარი მოვათავსოთ ქვაბში და მუდმივად ვურიოთ. ავადუღოთ და 30-40 წამის შემდეგ გადმოვდგათ ცეცხლიდან. გავაციოთ.

3. კენკრის ფენა კენკრას მოვაყაროთ შაქარი, წამოვადუღოთ და დავამატოთ სახამებელი, რომ მასა შესქელდეს. გავაციოთ. 

• დიეტა აღდგომის შემდეგ - როგორ დავიკლოთ პასკითა და სადღესასწაულო კერძებით მომატებული კილოგრამები - დალი ჩიტალაძის რჩევები 

4. ხაჭოს მასა ხაჭო საცერზე დავტოვოთ 3-4 საათით, რათა ზედმეტი სითხე ჩამოიწუროს. შემდეგ ბლენდერში მოვათავსოთ კარაქთან ერთად და 3-4 წუთის მანძილზე ვთქვიფოთ, ერთგვაროვანი მასის მიღებამდე. ჩავამატოთ გაგრილებული კვერცხის მასა და კარგად ავურიოთ. 

5. შეკრება მზა ხაჭოს მასა მოვათავსოთ შოკოლადის ფორმაში, დავამატოთ კენკრის ფენა და ზემოდან ისევ ხაჭო. გავიმეოროთ 2 ან სამჯერ. დავადოთ თეფში და შევდგათ მაცივარში მთელი ღამით.

• "საოცრად ნაზია შიგნიდან და ხრაშუნა შოკოლადის გარსითაა გაფორმებული" - ხაჭოს პასკის რეცეპტი ლიკა კვარაცხელიასგან 

მირანდა ხაჩიძის რეცეპტი

პასკის ცომი საშუალო უნდა იყოს, არ უნდა იყოს რბილი. ზელვას რომ იწყებ ყველაფერი ხელზე გეკრობა, პროცესში ნელ-ნელა გშორდება ხელებიდან. ცომი უნდა ზილოთ იმდენი ხანი, რამდენი ხანიც ნებისყოფა გეყოფათ, უკეთესი გამოვა. კარგი იქნება ნახევარი საათის განმავლობაში ხელში დამუშავებული ცომი.

საჭიროა სამი ინგრედიენტი - დარიჩინი, ილი და მიხაკი. სხვა დანარჩენი, იმპროვიზაციის საკითხია. პირადად მე, ქიშმიში არ მიყვარს და არ ვუმატებ, სამაგიეროდ, ვუკეთებ ბევრ ცუკატს. შაქარს ვაკლებ, რადგან ვცდილობ ზევიდან მინანქარი გავუკეთო, ან შაქრის ფხვნილი მოვაყარო.

 ცომი ყველა ვარიანტში აფუვდება, მაგრამ რასაც ვაკვირდები, ზოგჯერ მზარულებს ნებისყოფა არ ყოფნით. რაც უფრო დიდ ხანს მოზილავთ, უფრო კარგი გამოდის. ამაშია საქმე. გიყვარს, ეფერები, ელოლიავები. გაფუებასაც და ზელვასაც უნდა დაელოდო. თუ სისქე დააკლდება, წყალს ვუმატებთ.

საშუალო ზომის 6-7 ცალი პასკის მოსამზადებლად დაგვჭირდება 10 კვერცხი, ერთი კილო - კილონახევარი შაქარი. გოგლიმოგლს ცალკე ვთქვიფავთ. ცალკე ვაყენებთ საფუარს რძეში. 25 გრამ საფუარს ლიტრ თბილ რძეში გავხსნით.

ვუმატებთ ნახევარ-ნახევარ ჩაის კოვზ ილის, დარიჩინსა და მიხაკს. გვჭირდება 300 გრამამდე გამლღვალი, არაადუღებული კარაქი. სამ კილომდე ფქვილში ვასხამთ გოგლიმოგლს, ვურევთ ცხიმს - დამდნარ კარაქს, ვამატებთ რძეს და საფუარს და ვიწყებთ ზელვას. ეს ყველაფერი ცალ-ცაკლე უნდა იყოს გამზადებული. ვზელთ ხელით. სილიკონის ხელთათმანებს თუ გაიკეთებთ, ცომი ხელზე არ მიგეკრობათ. ვზელთ 15-20 წუთი, როდესაც გახდება ერთი მასა, ხელზე არ მოგვეკრობა, ვუმატებთ ცუკატებს და ვაგრძელებთ ზელვას ცუკატებთან ერთად.

ცომი არ უნდა იყოს არც მაგარი, არც ძალიან თხელი. ისეთი კონსისტენცია უნდა ჰქონდეს, რომ ზელვა გსიამოვნებდეთ. ცომს გასაფუებლად თბილ ადგილას ვტოვებთ. ზევიდან მხოლოდ ნაჭერს ვაფარებთ. არ ვფუთავთ. ვაჩერებთ დაახლოებით 20 წუთი. შემდეგ ისევ უნდა ჩავზილოთ. კარგი იქნება, სამჯერ ჩაზილვა. შემდეგ უნდა ჩავდოთ ფორმებში და იქაც ველოდებით გაფუებას. მე საღამოს ვზელ, ღამე ორჯერ ვდგები, ჩავაბრუნებ, დილით ვაცხობ.