„ბურდადან“ ამოვჭრიდი ხოლმე თარგებს და ვიკერავდი... სახეზე მკვებავი კრემი არასდროს წამისვამს" - მაყვალა ჩიხლაძის ცხოვრება სცენის მიღმა - Marao
„ბურდადან“ ამოვჭრიდი ხოლმე თარგებს და ვიკერავდი... სახეზე მკვებავი კრემი არასდროს წამისვამს" - მაყვალა ჩიხლაძის ცხოვრება სცენის მიღმა
ერთ დროს წარმატებული მომღერლების, არჩილ და მაყვალა ჩიხლაძეების სიმღერები დღეს მთელმა საქართველომ ზეპირად იცის. 80-იანი წლების დასაწყისში, მათი შესრულებული „კართან მოდგა შემოდგომა“ და „სიჭაბუკე“ ყველაზე პოპულარულ სიმღერებად იქცა. ყველაფერი კი 60-იან წლებში, ფილარმონიაში დაიწყო, როცა წყვილმა ერთმანეთი პირველად გაიცნო.
დუეტი 1964 წელს არჩილ ჩიხლაძის ხელმძღვანელობით შეიქმნა. რამდენიმე წლის შემდეგ არჩილი და მაყვალა დაოჯახდნენ და მათ დუეტს „ჩიხლაძეები“ ეწოდა. არაერთხელ იმოგზაურეს ძალიან წარმატებული გასტროლებით საბჭოთა კავშირსა და მსოფლიოს მასშტაბით, მათ მიერ შესრულებული სიმღერები დღემდე ინარჩუნებენ განსაკუთრებულ პოპულარობას ქართველ და მსოფლიო მსმენელში.
მართალია მოგვიანებით მათი ოჯახი დაინგრა, თუმც ხალხისთვის მაყვალა და არჩილ ჩიხლაძეები ყველაზე საყვარელი დუეტად დარჩა. წყვილს ქორწინებაში ორი შვილი შეეძინა.
"მაყვალა ფილარმონიაში გავიცანი. მაშინ ტრიოში მღეროდა. მისი ხმა ძალიან მომწონდა. რეპეტიციებზე მივდიოდი და ვუსმენდი. მაყვალამდე დუეტში სიმღერის გამოცდილება მქონდა – გიზო დათუაშვილთან ერთად ვმღეროდი და მე პირველ ხმას ვასრულებდი. შემდეგ მაყვალას ტრიო დაიშალა და აპირებდა, ისევ ტრიო გაეკეთებინა. მე მას ჩემთან ერთად სიმღერა შევთავაზე. მართლაც, გავაკეთეთ დუეტი და ისეთი კარგი გამოვიდა, ერთ კვირაში მე და მაყვალა გასტროლებზე გაგვიშვეს. დღეს, არ არსებობს ოჯახი, ჩიხლაძეები რომ არ იცოდნენ. ჩვენი უამრავი ფირფიტა გამოდიოდა...
მე ძალიან ეშმაკი, მექალთანე ვიყავი. პოპულარული ბიჭი ვიყავი, ქალებისგან ყურადღება არ მაკლდა. მაყვალა რომ ჩემი ცოლი გახდა უკვე შეჩვეული ვიყავი, მომწონდა ახალ-ახალ გოგოებთან ურთიერთობა. ქალი მიყვარს. ქალს რომ დავინახავ, ახლაც ვდნები... მე ამ ყველაფერს სერიოზულად ვერ აღვიქვამდი. მაყვალა კი პატარა გოგოსავით იყო, თითქოს აკვნიდან ახლა ამოიყვანესო – მიამიტი, უეშმაკო... ყველაფერი გულთან ახლოს მიჰქონდა, ტიროდა, ძალიან ასერიოზულებდა.
ახლა რომ ვფიქრობ, ძალიან ვნანობ. მაშინაც ვფიქრობდი ხოლმე, რომ ცუდად ვიქცეოდი... ცოტა ხანს გავჩერდებოდი, მაგრამ ისევ ვაგრძელებდი... მაშინ იმდენს ვერ ვხვდებოდი, მერე მივხვდი, მარტო რომ დავრჩი. მაყვალას თანადგომითა და ხათრით, ყველა ძმაკაცი, თუ მეგობარი ჩამომშორდა – ეცოდებოდათ. მე, ვითომ იხტიბარს არ ვიტეხდი, მაგრამ ძალიან ვნანობდი, რომ ადამიანს ვჩაგრავდი, მისი მიამიტობით ვსარგებლობდი... ჩემი მხრიდან საშინელი საქციელი იყო, მაგრამ, სამწუხაროდ, გვიან ხვდები ადამიანი... მაყვალას დაკარგვის შემდეგ ყველაფერი აირია. ვიპოვე, მაგრამ ვერ გავუფრთხილდი, სულელურად დავკარგე", - ამბობდა არჩილ ჩიხლაძე.
მაყვალა ჩიხლაძე ახალგაზრდობის წლებზე
ამჯერად მომღერალი მაყვალა (მაკო) ჩიხლაძე, „სარკესთან“ იხსენებს, რომ მისი ახალგაზრდობის თბილისი პატარა პარიზი იყო, სადაც გემოვნებიანი ხალხი ცხოვრობდა და ევროპულ მოდას მისდევდა. 86 წლის მომღერალი „სარკის“ ახალ ნომერში ამხელს საიდუმლოს, თუ რატომ არ შეცვლილა მისი გარეგნობა ახალგაზრდობის მერე.
მაყვალა ჩიხლაძე: „ბურდადან“ ამოვჭრიდი ხოლმე თარგებს და ვიკერავდი. ასეთი თარგებით მაქვს შეკერილი კაბები, კოსტიუმები, ქურთუკები, შარვლები. განა მარტო ჩემთვის ვკერავდი, სხვებსაც ვუკერავდი…
ახალგაზრდებს ყოველთვის კარგად გვეცვა. ქართველები გემოვნებას არ ვუჩივით. საერთოდ, ძალიან გემოვნებიანი ხალხი ვართ. მაშინ თბილისს პატარა პარიზს ეძახდნენ. ახალგაზრდებს დახვეწილად და გემოვნებიანად ეცვათ…
პუდრი და პომადა - სულ ეს არის ჩემი მაკიაჟი. პომადის გარეშე გარეთ არ გავდივარ. ჟოლოსფერია ჩემი, ძალიან მიხდება. სახეზე მკვებავი კრემი არასდროს წამისვამს, მხოლოდ ახლა დავიწყე მისი გამოყენება…
ინტერვიუ სრულად იხილეთ ჟურნალ „სარკის“ ახალ ნომერში