"ცხვარი რომ მოხვდება მგლების ხროვაში, ზუსტად ეგეთი შეგრძნება მქონდა" - ნანუკა სტამბოლიშვილი კრიტიკისა და ნეგატიური კომენტარების შესახებ - Marao
"ცხვარი რომ მოხვდება მგლების ხროვაში, ზუსტად ეგეთი შეგრძნება მქონდა" - ნანუკა სტამბოლიშვილი კრიტიკისა და ნეგატიური კომენტარების შესახებ
ნანუკა სტამბოლიშვილი ქართველმა და თურქმა მაყურებელმა რამდენიმე წლის წინ გაიცნო, როცა მან მონაწილეობა რამდენიმე პოპულარულ თურქულ სერიალში მიიღო. მოგვიანებით ნანუკა ქართულ პროექტ „ცეკვავენ ვარსკვლავებში“ მონაწილეობდა. მის მიმართ ინტერესი და სიყვარული კი სულ უფრო იზრდება - ნანუკას როგორც ქართველი, ისე თურქი გულშემატკივრების არმია ჰყავს.
მიუხედავად იმისა, რომ ხშირად საუბრობენ ნანუკა სტამბოლიშვილის განსაკუთრებულ ნიჭსა და გარეგნობაზე, როგორც აღმოჩნდა, მან მაყურებლების ნაწილის მხრიდან კრიტიკაც დაიმსახურა, რის შესახებაც გადამექეცი „ყავა ბათუმურად“ ისაუბრა.
ნანუკა სტამბოლიშვილი სერიალ Emanet-ში მთავარ როლს ასრულებს. მან სერიალში მონაწილეობა მესამე სეზონიდან გააგრძელა და ნეგატიური კომენტარები სწორედ ამის გამო დაიმსახურა - მაყურებელი ძველი მსახიობის დაბრუნებას ითხოვდა:
„როდესაც სერიალში მონაწილეობის ეს დაუჯერებელი შემოთავაზება მივიღე, მაფრთხილებდნენ, რომ წინა სეზონის წყვილებს თავიანთი გულშემატკივრები ჰყავდათ, ამიტომ, შესაძლო იყო, ნეგატივი წამოსულიყო.
ვერ აგიხსნით, რა მოხდა, ახლაც გამაჟრჟოლა, რომ გამახსენდა, რამხელა სტრესი გადავიტანე. თუ ფსიქოლოგიურად ძლიერი არ ხარ, ამას ვერავინ გაუძლებს. ცხვარი რომ მოხვდება მგლების ხროვაში, ზუსტად ეგეთი შეგრძნება მქონდა. ისეთ რამეებს წერდნენ, ვფიქრობდი საიდან მოიგონეს მეთქი“, – ამბობს ნანუკა სტამბოლიშვილი გადამექეცი „ყავა ბათუმურად“ საუბრისას.
Emanet - სხვისი შვილი
ცნობილი თურქული სერიალის მთავარი გმირი ქალის როლს ქართველი მსახიობი ნანა სტამბოლიშვილი ასრულებს. "Emanet" ("სხვისი შვილი") ასე ჰქვია სერიალს, რომელიც წლებია უკვე სხვადასხვა ქვეყანაში დიდი რეიტინგით სარგებლობს და ის ერთ-ერთ ქართულ არხზეც გადის.
სერიალში მთავარ გმირ ქალს ცნობილი თურქი მსახიობი, სილა თურქოღლუ თამაშობდა, შეყვარებული მამაკაცის როლს კი, როგორც ხშირად უწოდებენ, "გაუცინარი კაცი" ჰალილ იბრაჰიმ ჯეიჰანი. წარმატებული სერიალი მაყურებელმა მალე შეიყვარა, თუმცა მეორე სეზონის ფინალი სილას გარეშე გადაიღეს, რადგან ქალი მოულოდნელად სერიალიდან წავიდა. ის უბრალოდ ადგა და გადაღებებზე აღარ მივიდა და განაცხადა, რომ მესამე სეზონში მონაწილეობაზე უარს ამბობდა.
სერიალი განსაკუთრებულად პოპულარულია თურქეთის საზღვრებს გარეთ. მთავარ გმირებს კი ჰალილსა და სილას საუკეთესო წყვილად აღიარებდნენ სოციალურ ქსელში. ისინი შეყვარებულებადაც გამოაცხადეს და წერდნენ, რომ დაქორწინებასაც კი აპირებდნენ. სილა თურქოღლუმ სერიალის გადამღები კომპანია Karamel Yapım-ი მობინგში დაადანაშაულა.
მსახიობმა განცხადება ადვოკატის საშუალებით გააკეთა. ქალს კონკრეტულად არ განუცხადებია თუ რა სახის ზეწოლას ახდენდნენ მასზე, რადგან ტერმინი მობინგი, მოიცავს თანამშრომლის დაშინებას, შანტაჟს, კრიტიკას, შეურაცხყოფას და დაცინვას.
სილას წასვლას დიდი აჟიოტაჟი მოჰყვა და მაყურებელმა არც ნანუკას მიმართ დაიშურა აგრესია. "სილა შეუცვლელია, მის გარეშე სრიალი წარმოუდგენელია" - წერდნენ ისინი, თუმცა ნანუკა მათ მალევე შეიყვარეს და ქართველი მსახიობი ახლა თურქებისთვისაც საყვარელი სახეა.