მადუროს ჩრდილი: ვინ არის სინამდვილეში ვენესუელის “პირველი მებრძოლი”  სილია ფლორესი? - Marao

სილია ფლორესი ვენესუელის ყოფილი პირველ ლედი, პოლიტიკოსი და გავლენიანი ფიგურაა პოლიტიკაში, თითქმის სამი ათწლეულის განმავლობაში. ის პრეზიდენტ ნიკოლას მადუროს მეუღლეა და მას ხშირად მოიხსენიებენ „პირველი მებრძოლის“ ტერმინით, რომელსაც თავად მადურო ანიჭებდა, რათა დაეტოვებინა შთაბეჭდილება, რომ ის მხოლოდ პირველი ლედი არ არის, არამედ აქტიური მონაწილეა პოლიტიკაში.

ადრეული ცხოვრება და კარიერა

სილია ფლორესი 1956 წელს დაიბადა ვენესუელაში, საშუალო კლასის ოჯახში და იურიდიულ განათლებას დაეუფლა კარაკასის უნივერსიტეტში. მორიგი კარიერული ეტაპი მისთვის პოლიტიკაში შესვლით დაიწყო: 1990‑იან წლებში, როდესაც ის გახდა ადვოკატი და მხარი დაუჭირა ჰუგო ჩავეს, როდესაც იგი იმყოფებოდა საპატიმროში 1992 წლის გადატრიალების შემდეგ. სწორედ მისი დახმარებით შევიდა პოლიტიკაში, შეიძინა ძლიერი კავშირები და გავლენა, რაც შემდეგ მისი კარიერული წინსვლის საფუძველი გახდა.

ფლორესმა საკუთარი გზა პოლიტიკაში დამოუკიდებლად შექმნა:

• 2000 წლიდან რამდენიმე ვადით იყო ვენესუელის ეროვნული ასამბლეის დეპუტატი.
• 2006–2011 წლებში, ის გახდა პირველი ქალი, რომელიც თავმჯდომარეობდა ეროვნულ ასამბლეაში – უმაღლეს კანონმდებლობით ორგანოში, სადაც მან  ძალაუფლება მოიპოვა.
• 2012–2013 წლებში ის ვენესუელის პროკურორი იყო, რაც ერთ-ერთი ყველაზე ძლიერი სახელმწიფო პოზიციაა.

ახლა მას მინიჭებული ჰქონდა არა მხოლოდ ფორმალური ტიტული, არამედ რეალური გავლენა პოლიტიკურ და სასამართლო გადაწყვეტილებებზე, რასაც ბევრი საერთაშორისო კრიტიკოსი “ფაქტობრივად ქვეყნის მართვის ცენტრად” მიიჩნევდა.

ნიკოლას მადურო და მისი ქორწინება

ნიკოლას მადურო და სილია ფლორესი ერთმანეთს 1990-იან წლებში შეხვდნენ, როდესაც ორივე აქტიურად იყო ჩართული ჰუგო ჩავესის პოლიტიკური მოძრაობის მხარდამჭერ საქმიანობაში. მათი ურთიერთობა თანდათან პროფესიულ პარტნიორობადაც ჩამოყალიბდა - ორივე მათგანი იზიარებდა ჩავიზმის იდეოლოგიას და მონაწილეობდა ქვეყნის პოლიტიკურ პროცესებში.

წყვილმა ოფიციალურად იქორწინა 2013 წელს, იმავე წელს, როდესაც ნიკოლას მადურო ვენესუელის პრეზიდენტი გახდა. ქორწინების შემდეგ სილია ფლორესმა უარი თქვა ტრადიციულ „პირველი ლედის“ ტიტულზე და საკუთარ თავს „პირველ მებრძოლს“ უწოდებდა, რითაც ხაზს უსვამდა, რომ ის მხოლოდ სიმბოლური ფიგურა არ იყო, არამედ აქტიური მონაწილე პოლიტიკური ბრძოლების.

მათი ქორწინება ხშირად განიხილება როგორც პოლიტიკური და პირადი პარტნიორობის ერთობლიობა. სილია ფლორესი წარსულში იკავებდა ვენესუელის ეროვნული ასამბლეის თავმჯდომარის, დეპუტატის და სხვა მაღალ თანამდებობებს, რაც მას ქვეყნის ძალაუფლების სისტემაში მნიშვნელოვან როლს ანიჭებდა. სწორედ ამიტომ, უცხოური მედია ხშირად აღნიშნავს, რომ მადუროსა და ფლორესის ქორწინება არა მხოლოდ ოჯახური კავშირია, არამედ მძლავრი პოლიტიკური ალიანსიც.

მიუხედავად კრიტიკისა და სკანდალებისა, რომლებიც წლების განმავლობაში წყვილს თან ახლდა, ისინი საჯარო სივრცეში ყოველთვის ერთად ჩნდებიან და ერთმანეთის მხარდაჭერას ღიად გამოხატავენ. მადურო არაერთხელ აღნიშნავდა, რომ სილია ფლორესი მისი ყველაზე ახლო მრჩეველი და თანამებრძოლია, ხოლო ფლორესი მას „რევოლუციის ერთგულ ლიდერად“ მოიხსენიებს.

დღეს ნიკოლას მადუროსა და სილია ფლორესის ქორწინება ვენესუელის პოლიტიკურ რეალობაში ერთ-ერთ ყველაზე გამორჩეულ და გავლენიან პარტნიორობად ითვლება - ურთიერთობად, სადაც პირადი ცხოვრება და სახელმწიფო ძალაუფლება ერთმანეთთან მჭიდროდ არის გადახლართული.

ნიკოლას მადუროს დაკავება

ვენესუელის ყოფილი პრეზიდენტი ნიკოლას მადურო და მისი მეუღლე სილია ფლორესი დაუჯერებელი და უპრეცედენტო მოვლენების ეპიცენტრში აღმოჩნდნენ - ისინი აშშ-ის სამხედრო ოპერაციის შედეგად დააკავეს და ამერიკის ფედერალურ სასამართლოში წარადგინეს.

2026 წლის 3 იანვარს აშშ-ის შეიარაღებული ძალების მიერ დაგეგმილ და შესრულებულ ოპერაციაში, რომელიც ამერიკულმა მხარემ „Operation Absolute Resolve“ დაარქვა - ნიკოლას მადურო და სილია ფლორესი დააკავეს ვენესუელის დედაქალაქ კარაკასში. ოპერაცია ჩატარდა თავდაცვის სამინისტროს სპეციალური ძალებისა და სადაზვერვო სტრუქტურების მონაწილეობით.

მადურო და ფლორესი აშშ-ში ტრანსპორტირებიდან მალევე მანჰეტნის ფედერალურ სასამართლოში წარდგნენ. მათ წაუყენეს ბრალდებები, რომლებიც მიეკუთვნება ნარკოტერორიზმს, ნარკოტიკის დიდი ოდენობით იმპორტირებასა და იარაღთან დაკავშირებულ დანაშაულს

მადურომ სასამართლოზე სადავოდ გამოაცხადა თავისი დაკავება, აცხადებდა, რომ ის კვლავ ვენესუელის კონსტიტუციური პრეზიდენტია და მისთვის წაყენებული ბრალდებები პოლიტიკური დევნაა. ფლორესი ასევე უარყოფს ბრალეულობას და სასამართლოში შესაბამის პოზიციას ინარჩუნებს. 

10 ფაქტი სილია ფლორესზე

• ის მადუროზე უფროსი

ასილია ფლორესი ნიკოლას მადუროზე 6 წლით უფროსია. ისინი წლებია ერთად არიან, თუმცა ოფიციალურად მხოლოდ 2013 წელს დაქორწინდნენ, მას შემდეგ, რაც მადურო პრეზიდენტი გახდა.

• „პირველი მებრძოლი“ და არა „პირველი ლედი“

მან უარი თქვა ტრადიციულ ტიტულზე „პირველი ლედი“ (Primera Dama) და ამჯობინა ეწოდებინათ „პირველი მებრძოლი“ (La Primera Combatiente). ამით ხაზს უსვამს თავის რევოლუციურ და პოლიტიკურ სტატუსს.

• „ნარკო-ძმისწულების“ სკანდალი

მისი ორი ძმისწული, ეფრაინ კამპო ფლორესი და ფრანსისკო ფლორეს დე ფრეიტასი, 2015 წელს ჰაიტიზე აშშ-ის ნარკოტიკების წინააღმდეგ ბრძოლის სამმართველომ (DEA) დააკავა. მათ 800 კგ კოკაინის აშშ-ში შეტანის მცდელობისთვის 18-წლიანი პატიმრობა მიესაჯათ (მოგვიანებით ისინი პატიმრების გაცვლის პროგრამით გაათავისუფლეს).

• სანქციების „კოლექციონერი“

სილია ფლორესი ერთ-ერთია იმ მცირე რაოდენობის პირველ ლედებს შორის, რომელსაც პერსონალური სანქციები დაუწესა აშშ-მა, კანადამ, ევროკავშირმა და შვეიცარიამ. მას ბრალად ედება კორუფცია და ადამიანის უფლებების დარღვევა.

• საიდუმლოებით მოცული ქონება

მიუხედავად იმისა, რომ ის თავს „ხალხის მებრძოლად“ წარმოაჩენს, არსებობს არაერთი ჟურნალისტური გამოძიება მის ფუფუნებაში ცხოვრებაზე, ძვირადღირებულ უძრავ ქონებაზე საზღვარგარეთ და კავშირებზე კომპანიებთან, რომლებიც სახელმწიფო შესყიდვებიდან მილიონებს იღებენ.

• მკვლელობა და შურისძიება

2014 წელს მოკლეს სილია ფლორესის ერთ-ერთი ახლობელი და დაცვის წევრი. ვენესუელური ოპოზიციური წყაროების თანახმად, ფლორესმა პირადად გასცა ბრძანება, რომ დამნაშავეები ნებისმიერ ფასად "გაენადგურებინათ". ამას მოჰყვა სპეცოპერაციების სერია, რომელსაც ბევრი ადამიანის სიცოცხლე შეეწირა სასამართლოს გარეშე.

• "კასტას" შექმნა: 40 ნათესავი ერთ უწყებაში

ეს არ იყო უბრალო ნეპოტიზმი — როდესაც ის პარლამენტის სპიკერი იყო, მან საკუთარი ოჯახის 40 წევრი (ძმები, დები, დისშვილები, ბიძაშვილები) პირდაპირ პარლამენტის აპარატში დაასაქმა. როდესაც ჟურნალისტებმა ეს ამბავი გამოამჟღავნეს, მან საჯაროდ განაცხადა: "დიახ, ისინი ჩემი ოჯახის წევრები არიან და მე ამით ვამაყობ".

• მანიპულაცია ჩავესის სიკვდილით

არსებობს ვერსიები, რომ სილია ფლორესი იყო ერთ-ერთი მთავარი ფიგურა, ვინც მალავდა უგო ჩავესის რეალურ მდგომარეობას მისი სიკვდილის წინ. ის აკონტროლებდა ინფორმაციის ნაკადს, რათა მადუროსთვის ძალაუფლების გადაცემის პროცესი მშვიდად და კანონიერად მომზადებულიყო, მაშინ როცა ჩავესი, შესაძლოა, უკვე კლინიკურად მკვდარი იყო.

• ჯადოქრობა და "საი ბაბა"

მადურო და სილია ფლორესი წლების განმავლობაში იყვნენ ინდოელი გურუს, საი ბაბას მიმდევრები. ისინი პირადად იყვნენ ინდოეთში მასთან ვიზიტით. ვენესუელაში ბევრი თვლის, რომ წყვილი გადაწყვეტილებების მიღებისას ხშირად მიმართავს ოკულტისტებსა და "სანტერიას" (ადგილობრივი მაგიური რიტუალები) რიტუალებს ძალაუფლების შესანარჩუნებლად.

• ოქროთი ვაჭრობა და "სისხლიანი მაღაროები"

გამოძიებები მიუთითებენ, რომ სილია ფლორესი და მისი შვილები (პირველი ქორწინებიდან) აკონტროლებენ ვენესუელის ე.წ. "ორენოკოს სამთო რკალს", სადაც უკანონოდ მოიპოვება ოქრო. ამ ოქროს გაყიდვით მიღებული მილიონები პირდაპირ მათ ოფშორულ ანგარიშებზე ილექება, მაშინ როცა ქვეყანა შიმშილობს.