"როცა დავქორწინდით ირაკლი 17 წლის იყო, მე კი 19-ის... ქორწილიც არ გვქონია" - ნათია ფანჯიკიძის აქამდე უცნობი ფოტოისტორიები და ამბები მეუღლეზე - Marao
"როცა დავქორწინდით ირაკლი 17 წლის იყო, მე კი 19-ის... ქორწილიც არ გვქონია" - ნათია ფანჯიკიძის აქამდე უცნობი ფოტოისტორიები და ამბები მეუღლეზე
ნათია ფანჯიკიძე რადიო თავისუფლების პროექტის "8 ფოტო არქივიდან" სტუმარი იყო. მან გადაცემის ფარგლებში რამდენიმე ფოტოს ისტორია გაიხსენა. ერთ-ერთი კი მის მეუღლეს, ირაკლი ალასანიას ეხებოდა:
"ირაკლის საყვარელი საქმიანობა იყო ბავშვების დაბანა. ჩემი შვილები სულ პაწაწინები რომ იყვნენ, მეშინოდა მათზე ხელის მოკიდება, ირაკლი კი მათ დაბანას თავის თავზე იღებდა. ეს მოვალეობა მას კარგა ხანს შერჩა. შვილიშვილთანაც ასე იქცევა. მახსოვს სანამ ბავშვებმა სხეული არ გაიმაგრეს, სულ მეშინოდა, რატომ იყვნენ ჟელატინის მსგავსები. ყველაფერს მე ვაკეთებდი, ხელშიც ვიყვანდი, მაგრამ ეს დაბანის მომენტი ირაკლიმ გადაიბარა და ისიც დიდი სიხარულით აქაფებდა ამ ბავშვებს.
ძალიან პატარები ვიყავით, რომ დავქორწინდით. მე ირაკლიზე ორი წლით უფროსი ვარ. ირაკლი იყო 17 წლის, მე კი 19. 18 და 20 წლისები ვიყავით, ხელი როცა მოვაწერეთ. ქორწილიც არ გვქონია, ომი იყო და უხერხულიც კი იყო. ომის დროსაც კი იხდიან ქორწილს, მაგრამ ორივეს მშობლები ძალიან დაზაფრულები იყვნენ და მაშინვე იყო გადაწყვეტილი, რომ არანაირი აღნიშვნა არ ყოფილიყო. სულ ვამბობდით, რომ წლების შემდეგ აღვნიშნავდით და ძალიან სასაცილოც იქნება, ამდენი წლის შემდეგ თეთრი ფატით, მანამ თუ არ დავხოცავთ ერთმანეთს. არასდროს პირობა არ უნდა დადო, რომ ცოლად გაჰყვები, რა იცი, რა ხდება," - ამბობს ნათია ფანჯიკიძე.
ნათია ფანჯიკიძისა და ირაკლი ალასანიას ოჯახი
ნათია ფანჯიკიძემ და ირაკლი ალასანიამ ერთმანეთი უნივერსიტეტში გაიცნეს. ირაკლი ნათიაზე ორი წლით უმცროსია - როცა იქორწინეს, მომავალი პოლიტიკოსი 18 წლის იყო:
"უნივერსიტეტში დავინახე და მალევე გამეცნო. როგორც მერე მითხრა, თავად უფრო ადრე, ერთ კაფეში შემამჩნია. პირველად ზოოპარკში გავისეირნეთ, ოღონდ იმიტომ არა, რომ ვინმეს ვემალებოდით, უბრალოდ, უნივერსიტეტთან ახლოს იყო. ბეჰემოთი მაშინ ცოცხალი იყო და რატომღაც ქალაქში გივის ეძახდნენ. მოვინახულეთ და ის გახდა ჩვენი პირველი სეირნობის თანაზიარი.
ირაკლი, საერთოდ, ძალიან ცოტას ლაპარაკობს, მაგრამ ყოველთვის ზუსტი იყო და რაც უნდოდა, იმას ამბობდა. მეც ძალიან სწრაფად, პრანჭვის გარეშე გავუმხილე გრძნობები. მიუხედავად იმისა, რომ მაშინ დედები სხვანაირად გვარიგებდნენ. ერთხელ მახსოვს, ქუჩაში მე და დედა მივდიოდით და ვიღაცამ შემომხედა. პატარა ვიყავი და დავეჯღანე. დედამ მითხრა, რომ ნორმალური გოგონები ქუჩაში ყველაფერზე არ რეაგირებენ, არც პირველ დაპატიჟებაზე მიჰყვებიან ბიჭს კინოში. მოკლედ, თავი გამოტენილი მქონდა თავშეკავების პრინციპებით, მაგრამ ყოველთვის შინაგანად ვიცოდი, რომ როდესაც მოგწონს, უნდა თქვა. ხშირად ადამიანები თავშეუკავებლები არიან ზიზღის გამოხატვაში, მაგრამ ასევე უხვად არ გასცემენ სიყვარულს. თუ გრძნობ, რომ გიყვარს, ამას რა სჯობს, თქვი!
ჩემი შვილები ადამიანებისადმი კეთილგანწყობილნი არიან და სწორი პრიორიტეტები აქვთ.ფიზიკურად ორივე, ეკაც და ნიკუშაც ირაკლის ჰგავს", - ამბობს წლების წინ ნათია ფანჯიკიძე.
ნათია ფანჯიკიძისა და ირაკლი ალასანიას ვაჟი, ნიკუშა ალასანია 2016 წელს დაქორწინდა ნუცა ადამიაზე. მათ ქალიშვილი შეეძინათ, რომელსაც თინათინი დაარქვეს. წყვილი მოგვიანებით ერთმანეთს დაშორდა, მაგრამ პატარა თინა ბებიასთან და ბაბუასთან დიდ დროს ატარებს.
„თინუშამ პატარა ბავშვთან ურთიერთობის, ზრუნვის და სიტკბოს ის შიმშილი ამოავსო ჩემთვის და ირაკლისთვის, რაც მოსდევს შვილების გაზრდას, როცა მათ ისე ვეღარ ეფერები, როგორც პატარებს. თინუშა გამათავისუფლებელს ვეძახი. პატარა ბავშვი ხომ გიბიძგებს, დაბრუნდე ღრმა ბავშვობაში და ითამაშო დამალობანა, ექიმობანა…
ბაბუ, გამომეკიდეო, დაუძახებს ირაკლის და გაიქცევა. ირაკლიც მისდევს. ბებო გოჭობანა მეთამაშეო მეუბნება და მეც გოჭის როლს ვთამაშობ. ამხელა ადამიანები ბავშვებივით ვიქცევით.
ბებოს ან ბებიკოს მეძახის, ირაკლის - ბაბუკას. ძალიან გვეფერება. ენით ვერ აღვწერ, რა განვიცადე, როცა თინა პირველად დავიჭირე ხელში. ვფიქრობ, მე მგავს, მიუხედავად იმისა, რომ ეს სიმართლე არ არის. გარეგნობით მამამისს და ბაბუამისს ჰგავს, რაღაცაში - დედამისსაც, მაგრამ ხასიათით და თვისებებით ეჭვიც არ მეპარება, რომ მე მგავს“, - ამბობს ნათია ფანჯიკიძე ჟურნალ "სარკესთან" ინტერვიუში.