"სულ მეუბნებოდა, რომ ყველაფერი კარგად იყო და კლდესავით მედგა გვერდით" - ნინო ჩხეიძე მეუღლესა და ოჯახზე - Marao

მომღერალი ნინო ჩხეიძე ცოტა ხნის წინ "მადისაღმძვრელი პოდკასტის" სტუმარი იყო. მან პოდკასტის განმავლობაში ძალიან ბევრ თემაზე ისაუბრა, მათ შორის, ოჯახსა და სილამაზის საიდუმლოზე.

ნინო ჩხეიძეს მეუღლე

"თავდაჯერებული ვიყავი, რადგან გიორგის ათასი პროცენტით სჯეროდა ჩემი, სულ მეუბნებოდა, რომ ყველაფერი კარგად იყო და კლდესავით მედგა გვერდით. მხოლოდ ფინანსები არ იყო მნიშვნელოვანი, აქ მნიშვნელოვანი იყო მისი გვერდში დგომა და მხარდაჭერა, რასაც ის მიკეთებდა, მაძლევდა რჩევებს და ვფიქრობდით რა გამეკეთებინა. ეს დღემდე ასე გრძელდება.

სუნამო, რომელიც გამოვუშვი, გიორგი ამაშიც ჩართულია, არამარტო ქმარი, არამედ მეგობარიც შეიძლება იყოს, როდესაც შენი სჯერა. როდესაც მსგავსი ადამიანები გყავს, ვერაფერი ვერ გაგტეხს, რადგან შენში ხედავენ იმ პოტენციალს, რასაც შეიძლება შენ ვერ ხედავდე. ბევრჯერ მქონია მომენტი, რომ რაღაცას ვერ შევძლებ, მაგრამ ის სულ მოტივაციას მაძლევდა. 

გიორგი ათ წელზე მეტია, არ ცხოვრობს საქართველოში, ის ყველანაირად გვერდში მიდგას, მორალურად და მეგობრულადაც. ჩვენ ცალ-ცალკე ვცხოვრობთ. გვაქვს ყოველდღიური კონტაქტი, რადგან მე საქართველოში ვარ, ის - საზღვარგარეთ.

მარიკო საქართველოშია და წელს ასრულებს მაგისტრატურას", - ამბობს ნინო.

• ნინო ჩხეიძის პირველი კომენტარი, დაშორდა თუ არა მეუღლეს: "გაშორდი? არ გაშორდი? მაგრამ გიორგი დღემდე ჩემს ცხოვრებაში არის ძალიან მნიშვნელოვანი ადამიანი.." 

წონის კლება

"ბოლო პერიოდში დავიკელი წონაში და ყველა მეკითხება, როგორ მოვახერხე ეს. ზოგს ჰგონია, რომ ოზემპიკი გავიკეთე, მაგრამ მე დავიკელი ტვინით. ტვინში გადავწყვიტე, რომ მსურდა წონაში დაკლება და არანაირი სპეციალური დიეტა არ დამიცავს. ადრე იყო, რომ ვშიმშილობდი - ერთი ვაშლი, შვიდი ჭიქა ჩაი, მხოლოდ იოგურტი და ამის გამო ორმაგად  ვიმატებდი. ახლა კი ყველაფერს მივირთმევდი, მაგრამ თავში მქონდა გადაწყვეტილი, რომ უნდა დავიკლო. ერთი წლის განმავლობაში რვა კილო დავიკელი. 

ჩემი გამოცდილებით რასაც მივხვდი, მთავარია არ დასტრესო საკუთარი თავი. ტორტსაც აუცილებლად ვსინჯავ ყოველთვის, მაგრამ ვცდილობ, რომ ზომიერად იყოს ყველაფერი. 

ჩემდა სამარცხვინოდ, ახლა არ მეხერხება საჭმლის კეთება, მაგრამ მე იმ თაობიდან ვარ, სუფრები რომ სახლში იშლებოდა და ყველაფრის კეთება ვიცოდი. დაოჯახების მერე ნორმალური დიასახლისი ვიყავი, ახლა კი ვერაფერს ვაკეთებ. სახლში არ მივირთმევ საჭმელს, რადგან მარტო ვცხოვრობ და ძირითადად მარტივი რაღაცები მაქვს სახლში, შუადღის სადილი კი ყოველთვის გარეთ მიწევს. მაცივარში ყოველთვის მაქვს სულგუნი, მიუხედავად იმისა, რომ კალორიულია, ვერასდროს ველევი. 

ერთი პერიოდი ვიყავი ინტუიციურ კვებაზე, არ ჭამ იმას, რასაც ხედავ, არამედ შენი ორგანიზმი გეუბნება, რა გინდა. სხვათა შორის, გაამართლა ამ მეთოდმა და რაოდენობრივად ნაკლებ საკვებს ვიღებდი. ბოლო დროს ძალიან მინდება თაფლი და თაფლიც ჩემს მაცივარში საპატიო ადგილს იკავებს," - ამბობს ნინო.

ნინო ჩხეიძის კარიერა

ნინო ჩხეიძე დაიბადა 1981 წლის 6 ივნისს, ქალაქ თბილისში, პროფესიით ეკონომისტის - გია ჩხეიძისა და მათემატიკოსის - ქეთინო ქოჩიაშვილის ოჯახში. ბავშვობიდან დადიოდა პიონერთა სასახლეში. 1999 წელს დაამთავრა მეხუთე მუსიკალური სკოლა. 1999-2002 წლებში სწავლობდა თბილისის სახელმწიფო უნივერსიტეტში ტელე-ჟურნალისტიკის ფაკულტეტზე, რის შემდეგაც სწავლა გააგრძელა მაგისტრატურაში იგივე განხრით. მისი პირველი სიმღერაა მაცაცო სებისკვერაძის „ჩემი გული შენია“. 2005 წელს ნინო ჩხეიძემ დაიწყო ქალაქური სიმღერების ჩაწერა, სადაც ჩაწერა ძველი ქალაქური სიმღერა „ჩემი გმირი გიწოდე“. შემდეგ ჩაწერა მარეხ გოძიაშვილის „წაღვერი და თბილისი“.

2006 წელს გამოვიდა ნინო ჩხეიძის პირველი ალბომი, სადაც შესული იყო 12 ძველი ქალაქური სიმღერები. 2007 წელს გამოვიდა მეორე ალბომი „უშენოდ“, სწორედ სიმღერა „უშენოდ“-ზე გადაიღო ჩხეიძემ ვიდეო რგოლი, რომლის რეჟისორები იყვნენ ბესო სოლომონაშვილი და ზვიად ალხანაიძე. 2008 წელს გამოვიდა კიდევ ორი ალბომი „ვიცი გიყვარვარ“ და საახალწლოდ ამავე წელს გამოუშვა კიდევ ერთი ალბომი „საუკეთესო სიმღერების კრებული“. 2008 წელს გადაიღო კიდევ ორი ვიდეო რგოლი სიმღერებზე „სანთელივით დავდნები“ და „ვიცი გიყვარვარ“ რამაზ ჩაჩანიძის რეჟისორობით. 2008 წლის 17 დეკემბერს გახსნა თავისი ხმის ჩამწერი სტუდია „ნიო სტუდიო“. 2009 წელს გამოვიდა კიდევ ორი ალბომი: ალბომი „5“ და ასევე „კარაოკე“.

2010 წელს გამოვიდა ალბომი „გამახარე“. 2010 წელს ნინო ჩხეიძე რადიო „აფხაზეთის ხმის“ მუსიკალური ხელმძღვანელი გახდა. 2011 წელს გამოვიდა ალბომი „მიყვარხარ ცამდე“. 2011 წელსვე ნინო ჩხეიძემ გადაიღო კიდევ ერთი ახალი ვიდეორგოლი, დუეტი ნინო ჩხეიძე და კაბუ „მიყვარხარ ცამდე“, რომლის რეჟისორი იყო ზურა მენთეშაშვილი. 2012 წელს ტელეკომპანია „იმედმა“ მიიწვია პირველ მეგა-პროექტ "ახალ ქართულ ხმაში" ერთ-ერთ მწვრთნელად. 2013 წელს გამოვიდა ალბომი „ნინო ჩხეიძე“. 2014-2017 წლებში ნინო ჩხეიძე იყო საავტორო მუსიკალური TV პროექტის - „საქართველოს ფანოღის“ იდეიისა და პროექტის ავტორი. 2015 წელს გამოვიდა კიდევ ერთი ახალი ალბომი „ნინო ჩხეიძე mp3“, სადაც შესულია მისი საუკეთესო სიმღერები. 2015 წელს გამოვიდა ალბომი „ნინო ჩხეიძე დუეტები“, სადაც შესულია დუეტები. 2016 წელს გამოვიდა ახალი ალბომი „ყველაფერი ხდება“. 2016 წელს შექმნა ბრენდი, რომელსაც დაარქვა NIO და აწარმოებს დღემდე ბრენდირებულ ქუდებს. 2017 წელს გამოვიდა ალბომი „ნინო ჩხეიძე“. 2018 წელს მიიღო მონაწილეობა პროექტ „ცეკვავენ ვარსკვლავებში“, ხოლო 2018 წელს შექმნა მუსიკალური ბენდი „NIO ბენდი".