2026 წლის TOP 10 უცხოელი ავტორი - რას კითხულობენ ყველაზე ხშირად საქართველოში - Marao

“ბიბლუსი” - წიგნის მაღაზიათა ქსელი აქვეყნებს  მიმდინარე წლის  სტატისტიკას, სადაც მკითხველთა ინტერესი, თუ რომელ უცხოელ მწერლებს ანიჭებენ ქართველი მკითხველები უპირატესობას, ნათლად ჩანს . ათეულში მოცემულია მსოფლიო ლიტერატურის შედევრები, რომლებიც წარმატებით ითარგმნა ქართულ ენაზე და მუდმივად ბესტსელერების  სიებშია. 

წარმოგიდგენთ „ბიბლუსის“ 2026 წლის TOP 10 ყველაზე მოთხოვნად უცხოელ ავტორს, რომელთა წიგნებიც აუცილებლად უნდა წაიკითხოთ. 

აგათა კრისტი 

დეტექტიური ჟანრის უკვდავი დედოფალი, აგათა კრისტი ისტორიაში შევიდა, როგორც ყველა დროის ერთ-ერთი ყველაზე ხშირად გამოქვეყნებული მწერალი ბიბლიისა და უილიამ შექსპირის შემდეგ. ინგლისელმა ავტორმა შექმნა ისეთი ლეგენდარული პერსონაჟები, როგორებიც არიან ერკიულ პუარო და მის მარპლი. აგათას ცხოვრების ყველაზე მისტიკური დეტალი 1926 წელს მის მიერ 11 დღით უკვალოდ გაუჩინარებაა, რამაც მთელი ბრიტანეთი ფეხზე დააყენა. ქართულად მისი ნაწარმოებები არ კარგავს აქტუალობას და ყველაზე გაყიდვადი ავტორების ათეულში, პირველ ადგილზეა. 

●        ყველაზე გაყიდვად წიგნებს შორის არის: „მკვლელობა აღმოსავლეთის ექსპრესში“, „და აღარავინ დარჩა“, „სიკვდილი ნილოსზე“. 

ფიოდორ დოსტოევსკი 

რუსული ფსიქოლოგიური რეალიზმის გენიოსი, ფიოდორ დოსტოევსკი თავის ნაწარმოებებში ღრმად იკვლევდა ადამიანის სულის ბნელ მხარეებს, მორალურ დილემებსა და ფილოსოფიურ საკითხებს. მის ცხოვრებაში გარდამტეხი აღმოჩნდა 1849 წელს პოლიტიკური ბრალდებით სიკვდილით დასჯის განაჩენი, რომელიც სიკვდილის წინ შეიწყალეს და ციმბირის კატორღით ჩაანაცვლეს. ამ გამოცდილებამ საფუძველი ჩაუყარა მის შემდგომ შედევრებს. ქართველი მკითხველისთვის დოსტოევსკის ტექსტები მუდმივ ინტელექტუალურ გამოწვევად რჩება. 

●        ტოპ 3 გაყიდვადი წიგნი ქართულად: „დანაშაული და სასჯელი“, „იდიოტი“, „ძმები კარამაზოვები“.

ჯ.კ. როულინგი 

ბრიტანელი მწერალი ჯ.კ. როულინგი თანამედროვე ლიტერატურის ფენომენია, რომელმაც მთელი თაობების ბავშვობა შეცვალა. პირველი წიგნის წერისას ის მარტოხელა დედა იყო, რომელიც ედინბურგის კაფეებში მუშაობდა, რადგან საკუთარი სახლის გათბობის საშუალება არ ჰქონდა. მისმა ფანტასტიკურმა სამყარომ მილიონობით ადამიანი მიაჯაჭვა კითხვას. დღეს მისი წიგნები ქართულენოვან სივრცეშიც ბესტსელერების სათავეშია.

●        ტოპ 3 გაყიდვადი წიგნი ქართულად: „ჰარი პოტერი და ფილოსოფიური ქვა“, „ჰარი პოტერი და საიდუმლო ოთახი“, „ჰარი პოტერი და აზკაბანის ტყვე“.

ჯორჯ ორუელი 

ერიკ ბლერის, იგივე ჯორჯ ორუელის სახელი დღეს სოციალურ-პოლიტიკური დისტოპიის სინონიმად იქცა. ბრიტანელი მწერალი და ჟურნალისტი თავად მონაწილეობდა ესპანეთის სამოქალაქო ომში, სადაც მძიმედ დაიჭრა, რამაც გადამწყვეტი გავლენა მოახდინა მისი პოლიტიკური მსოფლმხედველობის ჩამოყალიბებაზე. მისი წინასწარმეტყველური რომანები დღეს უფრო აქტუალურია, ვიდრე ოდესმე.

●        ტოპ 3 გაყიდვადი წიგნი ქართულად: „1984“, „ცხოველების ფერმა“, „მოგონებები კატალონიაზე“.

 ფრანც კაფკა 

პრაღაში დაბადებული გერმანულენოვანი მწერალი ფრანც კაფკა XX საუკუნის მოდერნისტული ლიტერატურის ერთ-ერთი ყველაზე გავლენიანი ფიგურაა. სიცოცხლეში მან თითქმის არაფერი გამოაქვეყნა და მეგობარს, მაქს ბროდს, ანდერძით მოსთხოვა, რომ მისი ხელნაწერები გაენადგურებინა - საბედნიეროდ, ბროდმა ეს თხოვნა არ შეასრულა. კაფკას შემოქმედება სავსეა აბსურდითა და ბიუროკრატიული კოშმარების განცდით.

●        ტოპ 3 გაყიდვადი წიგნი ქართულად: „მეტამორფოზი“, „პროცესი“, „სასახლე“.

 ჯეფ კინი 

ამერიკელი მწერალი, ანიმატორი და თამაშების დეველოპერი ჯეფ კინი   მსოფლიოში ცნობილი გახდა თავისი ილუსტრირებული სერიით, რომელიც მილიონობით ბავშვისთვის კითხვის სიყვარულის გაღვივების მთავარ მიზეზად იქცა. კინის წიგნები უნიკალური სტილითა და იუმორით გამოირჩევა, რომელიც სკოლის მოსწავლეების ყოველდღიურ ცხოვრებასა და სასაცილო გამოწვევებს ასახავს.

●        ტოპ 3 გაყიდვადი წიგნი ქართულად: „წრიპა  ბიჭის დღიური“, „წრიპა ბიჭის დღიური  - როდრიკი უბერავს“, „წრიპა ბიჭის დღიური 3 - ბოლო წვეთი“.

კრისტიან ჰანა 

თანამედროვე ამერიკული ისტორიული პროზის ერთ-ერთი ყველაზე წარმატებული ავტორი, კრისტიან ჰანა მწერლობამდე იურისტად მუშაობდა. მისი ნაწარმოებები ემოციური სიღრმითა და ძლიერი ქალი პერსონაჟებით გამოირჩევა, რომლებიც ისტორიული კატაკლიზმებისა და პირადი დრამების ფონზე იბრძვიან გადარჩენისთვის. მისმა რომანებმა ქართველი მკითხველების გულიც ადვილად მოიგო.

●        ტოპ 3 გაყიდვადი წიგნი ქართულად: „ბულბული“, "ქალები" და  "ოთხი ქარი“.

ანტუან დე სენტ-ეგზიუპერი 

ფრანგი არისტოკრატი, მწერალი და პილოტი ანტუან დე სენტ-ეგზიუპერი ცნობილია როგორც „ცის პოეტი“. იგი აქტიურად მონაწილეობდა მეორე მსოფლიო ომში და დაიღუპა კიდეც საბრძოლო გაფრენის დროს ხმელთაშუა ზღვის თავზე. მისი ფილოსოფიური ზღაპარი ადამიანურ ღირებულებებზე დღემდე მსოფლიოს ყველაზე ციტირებადი და საყვარელი წიგნების სიაშია.

●        ტოპ 3 გაყიდვადი წიგნი ქართულად: „პატარა პრინცი“, „ადამიანთა მიწა“, „ღამის ფრენა“.

ასტრიდ ლინდგრენი 

შვედი საბავშვო მწერალი ასტრიდ ლინდგრენი  მსოფლიო საბავშვო ლიტერატურის კლასიკოსია. მან შექმნა პერსონაჟები, რომლებიც ბავშვებს თავისუფლებას, სამართლიანობასა და ფანტაზიის ძალას ასწავლიან. ლინდგრენი ასევე აქტიურად იბრძოდა ბავშვთა უფლებებისა და ცხოველების დაცვისთვის შვედეთში, რამაც კანონმდებლობაც კი შეცვალა.

●        ტოპ 3 გაყიდვადი წიგნი ქართულად: „პეპი გრძელწინდა“, „ყაჩაღის ასული რონია“, „ბიჭუნა და სახურავის ბინადარი კარლსონი“.

დეივ პილკი 

ამერიკელი მწერალი და კარტუნისტი დეივ პილკი   ბავშვობაში ყურადღების დეფიციტისა და დისლექსიის გამო სკოლაში სირთულეებს აწყდებოდა, სადაც მას გაკვეთილებზე ხშირად დერეფანში სვამდნენ ხატვის გამო - სწორედ იქ დაიბადა მისი ცნობილი პერსონაჟების იდეა. დღეს მისი კომიქსები მილიონობით ტირაჟით იყიდება და ბავშვებს წიგნებთან მეგობრობას ასწავლის.

ტოპ 3 გაყიდვადი წიგნი ქართულად: „კაპიტან ტრიკო“, „დოგმენი“, „სუპერპუმპერსას თავგადასავალი “.

R