„დავიკელი 97 კილო და ახლა პლასტიკური ოპერაციების პროცესს გავდივარ“ - მარიამ ბოლქვაძე წონის კლებაზე - Marao
„დავიკელი 97 კილო და ახლა პლასტიკური ოპერაციების პროცესს გავდივარ“ - მარიამ ბოლქვაძე წონის კლებაზე
სოციალურ ქსელში ცნობილი ბლოგერი მარიამ ბოლქვაძე გამომწერებს წონის კლების შთამბეჭდავ შედეგებსა და მასთან დაკავშირებულ სიახლეებს აქტიურად უზიარებს. ამჯერად მან ყურადღება იმ პლასტიკურ ჩარევებზე გაამახვილა, რომლებიც დიდი რაოდენობით წონის დაკლების შემდეგ გახდა საჭირო.
"რაც უფრო დრო გადის, ზედა ქუთუთოს ბლეფაროპლასტიკის ნაწიბური ფერმკრთალდება. საერთოდ არაფერი არ ეტყობა.
ადამიანებს, რომლებიც ახლა მიერთდებით, კიდევ ერთხელ გეტყვით და ბევრჯერ განვმეორდები: დავიკელი 97 კილო და ახლა პლასტიკური ოპერაციების პროცესს გავდივარ. ამხელა წონას რომ დაიკლებ, მერე უკვე სხვა კომპლექსები იწყება - „ვაიმე, ხელი ასე მაქვს“, „ეს ჩამოწეული მაქვს“, „ფეხი ცუდად მაქვს“... მე ამ პროცესში ვარ. ახლა მუცლის აბდომინოპლასტიკა დამრჩა გასაკეთებელი. შეიძლება ვიზუალურად არ ეტყობა, მაგრამ ძალიან არაესთეტიკურად მაქვს და ამ პროცესსაც აუცილებლად გაჩვენებთ" - ამბობს მარიამი.
მარიამ ბოლქვაძის წონის კლება
მარიამი წლები ებრძოდა ჭარბ წონას, ბოლოს კი ბარიატრიული ოპერაციის გაკეთება გადაწყვიტა.
"ყოველთვის მომწონდა ჩემი თავი, ის პუტკუნა მარიამიც ძალიან მიყვარდა და ჯანმრთელობის პრობლემაც არასდროს შემქმნია. მქონდა ჩემი საქმე, შემოსავალი, მყავდა საოცარი მეგობრები და წონა დიდად არ მაწუხებდა, ვიტანდი ამ ყველაფერს, სანამ ცხოვრებაში ერთი გარდამტეხი მომენტი არ დადგა...
ჩემი ოპერაციის მიზეზი და მთავარი ბიძგი ჩემი შვილები გახდნენ. მახსოვს, ერთხელ გასართობ ცენტრში ვიყავი ტაისიასთან ერთად და მთხოვა, ბატუტზე მეხტუნავა. ვუთხარი: "დედიკო, ვერ ვიხტუნავებ, ჩავამტვრევ-მეთქი“. მან კი ანთებული თვალებით მითხრა: "არა, დედიკო, მაშას დათვი მულტფილმში რომ ხტუნაობს, არ ანგრევსო“ (ბავშვმა უნებლიედ დათვად აღმიქვა)... ამ სიტყვებმა გული მომიკლა და პირველად მაშინ გავაანალიზე რეალურად ჩემი წონა. ტაისიას ამ სიყვარულმა ამატირა და შევპირდი, რომ მომავალ წელს მასთან ერთად ვიხტუნავებდი ბატუტზე.
ღვთის წყალობით, ეს ოცნება ავუსრულე - ჩემმა მადლიანმა მეგობარმა ხელი მომკიდა და ბარიატრიული ოპერაცია გავიკეთე. ვფიქრობდი: "სად ვიყავი აქამდე?!“ ჯამში 97 კილოგრამი დავიკელი და წონა 155 კილოდან ჩამოვიდა," - ამბობდა მარიამი