ჯაბა კილაძის ქალიშვილი იუბილარია - რას სწერს ცნობილი ბებია შვილიშვილს - Marao
ცნობილი ოჯახი, ბრწყინვალე სამოდელო კარიერა და ევროპული განათლება: ლიზა კილაძე და მისი წარმატების ამბავი
ქართველი მაყურებლისთვის ერთ-ერთი ყველაზე საყვარელი და პოპულარული მსახიობი, ჯაბა კილაძე, საზოგადოებას დღემდე განსაკუთრებულად უყვარს. მის მიერ სერიალ „შუა ქალაქში“ ოსტატურად შესრულებული როლი წლების შემდეგაც არ კარგავს აქტუალობას და მაყურებლის გულში თბილ მოგონებად რჩება.
ცნობილი მსახიობების, ციცინო კობიაშვილისა და თემურ კილაძის ოჯახში გაზრდილი ჯაბა კილაძისთვის ოჯახი ყოველთვის განსაკუთრებულ ადგილს იკავებს. დღეს მსახიობის ქალიშვილს, ლიზა კილაძეს, დაბადების დღე აქვს.
მისალოცი პოსტით გამოეხმაურა შვილიშვილის იუბილეს ბებია, მსახიობი ციცინო კობიაშვილი.
"ჩვენო სიხარულო და ჩვენო სიყვარულო, დაბადების დღეს გილოცავ! ყოველი დღე და წუთი მახსოვს, როგორ ველოდებოდით შენს მოვლინებას ამ ქვეყანაზე… მადლობა უფალს შენი თავი რომ გვაჩუქა ჩვენო უძვირფასესო, ჩემი გული ხარ, ჩემი სინათლე და სიხარულის სათავე, უფალმა დაგილოცოს ხანგრძლივი, ბედნიერებით და წარმატებით სავსე ცხოვრების გზა, მრავალჟამიერ" - წერს ციცინო კობიაშვილი.
ჯაბა კილაძის ოჯახი
ჯაბას დედა მსახიობი ციცინო კობიაშვილია, მამა - თემურ კილაძე, ასევე მსახიობია.
"ის მთელი ცხოვრება უყურებს, რომ ჩვენ ხელიხელჩაკიდებულები მოვდივართ. ძალიან ბევრი რამ გადავიტანეთ ერთად. ომიანობის, შიმშილობის, გაუგებრობების პერიოდი. იყო შემთხვევები, როცა 10 კაპიკი გაგვიყვია, რომ ჯაბას სკოლაში წასასვლელი ფული ჰქონოდა და ჩვენ ისე დავრჩენილვართ. ყოფილა პერიოდი, როცა მარჯანიშვილის ქუჩაზე ტანკები იდგა, ტრანსპორტი არ მოძრაობდა. მარტყოფშიც გადავსახლდით მაშინ ამის გამო. ის ორი წელი ჯაბა მარტყოფში სწავლობდა, იქ ბუნებრივი გაზი იყო. მახსოვს პერიოდი, როცა სამსახურიდან მოსული გაყინულ ფეხებს მბჟუტავ "დუხოვკაში" ვითბობდი და არც მითბობდა. ღუმელიც დავდგით და მეზობლები ჩვენთან თბებოდნენ. ყველაფერი ეს გადავიტანეთ სიყვარულით, როგორც ყველამ ჩვენს ქვეყანაში. ამ ყველაფერს უყურებდა ჯაბა და დღეს სხვანაირად უყურებს ადამიანებს, სხვანაირი სიყვარული იცის. მიუხედავად ყველაფრისა, ისე მოხდა, რომ ოჯახი დაენგრა. დღემდე ძალიან განვიცდი ამას. გული მტკივა, რომ ჩემი შვილიშვილი ჩვენთან არ იზრდება. თუმცა ხშირად მოდის და ძალიან ვუყვარვართ. ყველანაირად ვეცადეთ, რომ ასე არ მომხდარიყო, მაგრამ მისი ოჯახის საქმე ჯაბას გადასაწყვეტი იყო. ძალიან კარგი ურთიერთობა მაქვს ყოფილ რძალთანაც, მაგრამ მერჩივნა, ეს არ მომხდარიყო. ჯაბამ კარგად ნახა, რა გაჭირვება გამოვიარეთ და ჩვენი ოჯახი დანგრევის საფრთხის წინაშე არასდროს დამდგარა. პირიქით, გაჭირვებამ უფრო გაგვაძლიერა და შეგვადუღა ერთმანეთს" - იხსენებდა ციცინო კობიაშვილი.
ჯაბა კილაძე 24 წლის ასაკში დაოჯახდა, მისი მეუღლე თამთა ჭილაძე იყო, ქორწინებაში წყვილს ერთი შვილი შეეძინა, მაგრამ მათი ურთიერთობა დიდხანს არ გაგრძელებულა.
"ჩვენს შემთხვევაში პრობლემა სხვა რამ იყო. დღემდე რატომ გვაქვს არაჩვეულებრივი ურთიერთობა ერთმანეთთან? იმიტომ, რომ პიროვნული პრობლემა ერთმანეთის მიმართ არ გვაქვს. უბრალოდ მივხვდით, რომ ეს ორი ელემენტი ერთმანეთთან ვერ ეწყობოდა - გამუდმებული დისკომფორტი იყო. როგორ ჯობია, რომ ბავშვი გაიზარდოს, ატმოსფეროში, სადაც დაძაბული გარემოა, თუ მშვიდ გარემოში, რომელმაც იცის, რომ დედაც ჰყავს, მამაც ჰყავს, ერთმანეთში პრობლემა არ აქვთ, უბრალოდ ერთად არ ცხოვრობენ" - აღნიშნავდა ჯაბა ერთ-ერთ ინტერვიუში.
ჯაბა კილაძისა და თამთა ჭელიძის ქალიშვილი, ლიზა კილაძე უკვე სრულწლოვანია, სკოლა საქართველოში დაამთავრა და ეკონომიკის მიმართულება აირჩია, პროფესიული გზის გასაგრძელებლად კი პრაღაში გაემგზავრა.
"ეკონომიკურზე სწავლობს პრაღაში, საუკეთესო უნივერსიტეტში. თვითონ ჩააბარა, დამოუკიდებლად. უმაღლესი ქულები აქვს. შარშანდელი წელი რომ დახურა, სიგელი და მადლობები გადასცეს. კურსზე ყველაზე ძლიერია. თან ისეთი ფაკულტეტი აირჩია… ყველაფერს ველოდი, გარდა იმისა, რომ ეკონომიკურზე ჩააბარებდა. სულ ბიჭები არიან მის კურსზე. თქვა, მაგათ არ ვათქმევინებ, რომ მჯობნიან, ნახონ, რა შემიძლიაო და მართლა ყველაზე ძლიერია. წელს ამთავრებს უკვე. სამოდელო სააგენტოშიც იყო და წარმატებებიც ჰქონდა, მაგრამ ყველაფერზე თქვა უარი და ასე გადაწყვიტა.
ძალიან დამოუკიდებელი და გონიერი ადამიანია, ფიქრობს იმაზე, რომ კარგად ისწავლოს, რომ თავის ქვეყანას გამოადგეს. ღმერთმა დალოცოს მისი გზა და ყველა იმ ახალგზარდისა, ვინც თავის ქვეყანაზე ფიქრობს. ვთვლი, რომ ამაზე დიდი მიზანი არ უნდა არსებობდეს", - ამბობდა ციცინო კობიაშვილი შვილიშვილზე.