"40 წლის ასაკში ვერ ვიქნები ისეთი, როგორიც 20 წლისას“ – ნინი ბადურაშვილი სილამაზის სტანდარტებზე - Marao
"40 წლის ასაკში ვერ ვიქნები ისეთი, როგორიც 20 წლისას“ – ნინი ბადურაშვილი სილამაზის სტანდარტებზე
მომღერალმა ნინი ბადურაშვილმა გადაცემა „Beauty Talks-ში“ სილამაზის საზოგადოებრივ სტანდარტებზე, ასაკის მატებასთან დაკავშირებულ ბუნებრივ ცვლილებებსა და ქალების მიმართ არსებულ არარეალურ მოლოდინებზე ღიად ისაუბრა.
მომღერლის თქმით, წლების მატებასთან ერთად ადამიანის გარეგნული ცვლილება ბუნებრივი პროცესია. საკუთარ გამოცდილებაზე საუბრისას, ბადურაშვილმა გაიხსენა კონკრეტული შემთხვევები, როდესაც მისი სხეული და გარეგნობა გარშემომყოფთა განხილვის საგანი გახდა
„ერთ-ერთმა მეგობარმა მითხრა, ასე უთქვამთო: ერთ-ერთ შოუში ფეხი ფეხზე მქონდა გადადებული, დამინახეს და შემდეგ მთელი სამეგობრო ჩემს გარეგნობას არჩევდა - როგორი თხელია ნინი, მაგრამ მასაც ჰქონია ცელულიტიო. ასევე გამიგია, რომ ასაკი დამეტყო, ნაოჭები მაქვს და ძალიან გავხდი.
ბუნებრივია, 40 წლის ასაკში ვერ ვიქნები ისეთი, როგორიც 20 წლის ვიყავი. მინდა, გამოვეხმაურო იმ ადამიანებს, რომლებიც ამბობენ: ადრე რა ლამაზი იყო, ახლა კი უკვე აღარ ჰქვია ლამაზი, უბრალოდ კარგი გოგოა.
მე არ მაქვს პრეტენზია სილამაზეზე, თუმცა მინდა, ერთი რამ აგიხსნათ: ცხიმოვანი განაწილება სახეზე აბსოლუტურად განსხვავებულია. ისეთი სახე, როგორიც გახსოვდათ, მაშინ მეტი ცხიმი მქონდა და სახეზეც ცხიმოვანი განაწილება სხვანაირი იყო,“ - ამბობს ნინი.
ნინი ბადურაშვილი
ნინი ბადურაშვილი - კარიერა, ოჯახი, შვილი ნინი ბადურაშვილი 1985 წლის 27 დეკემბერს რეჟისორ ერეკლე ბადურაშვილისა და ქართველი მომღერლისა და მსახიობის, ეკა კახიანის ოჯახში დაიბადა. ექვსი წლიდან "ბასტი-ბუბუს" სოლისტი იყო. პირველი კლიპი ბავშვობაში დათო ევგენიძის სიმღერაზე, „ნანა ჩემო ბაია" გადაიღო. ასევე იყო ჯგუფ "სტეფანე და 3G"-ს წევრი
ეკა კახიანს საზოგადოება კარგად იცნობს. ის ბევრისთვის საყვარელი მომღერალი და მუსიკოსია, თუმცა, გარდა კარიერისა, ეკა ხშირად იქცევს საზოგადოების ყურადღებას პირადი ცხოვრების გამოც. მიუხედავად არაერთი კითხვისა, ის საკუთარ ურთიერთობებზე ხმამაღლა არასდროს საუბრობს.
როგორც ცნობილია, ეკა ნაადრევ ასაკში რეჟისორ ერეკლე ბადურაშვილზე დაქორწინდა, რომელთანაც ქალიშვილი, ყველასთვის ცნობილი მომღერალი ნინი ბადურაშვილი ჰყავს. პირველი ქორწინება წარუმატებელი აღმოჩნდა და ერეკლესთან დაშორების შემდეგ ეკამ ნიკო თოფურიძეზე იქორწინა. მათ ორი შვილი, ანასტასია და ქეთო შეეძინათ.
"რამდენი ნიჭიერი და ლამაზი გოგოა ამ ქალაქში და მიკვირს, რატომ არის ნინის მიმართ ასეთი გაცხოველებული ინტერესი. ბავშვობიდან იყო განხილვის თემა. წერდნენ, რომ იყო ყველაზე სასურველი სარძლო. ეს თემა იყო ისეთი აქტუალური, ვფიქრობდი, რატომ ნინი? თბილისმა იცის ამოჩემება… რატომ არის ამდენი ხალხი დაკავებული ნინის ამბების განხილვით. ნინი სულ შეწუხებული იყო და ჩვენ ყველა, როდის გათხოვდებოდა. ეს ჩემზეც იყო, მაგრამ ვერ შევედრები ნინის…
არც გათხოვება უკითხავს ჩემთვის… მართლა თავისით გადაწყვიტა. სხვა ურთიერთობები ვიცოდით. ნინი ისეთი ტიპია, რომ არ მალავს. ყველაფერს ჰყვებოდა. ეს ბიჭი უცებ სად გაიცნო, არ ვიცი. მოვიდა და გვითხრა, ახლა უნდა გავთხოვდეო. ვინ არის, რა ჰქვია, რა გვარია-მეთქი. არა, გადავწყვიტე და უნდა გავთხოვდეო… არ მქონია იმის საშუალება, რომ მეთქვა ან კარგი, ან ცუდი. ჩავრთულვარ სხვა ურთიერთობებში, როცა ნინი განცდებში მინახავს და უბედური იყო, მაგრამ შემიძლია დავიფიცო, რომ ნინის და ირაკლის ურთიერთობაში არ ჩავრთულვარ… ნინიმ არასდროს არაფერში დამიჯერა და არც მიკვირდა, რადგან მასში ჩემს თავს ვხედავდი ზუსტად…“ - იხსენებდა ეკა კახიანი.
ნინის ქმარი რუსეთში მოღვაწე ქართველი ბიზნესმენი ირაკლი კუტალაძე იყო. 2012 წელს გრანდიოზული ქორწილის შემდეგ, ნინი რუსეთში გადავიდა საცხოვრებლად, თუმცა წყვილი მალევე დაშორდა ერთმანეთს. ქორწინება 4 თვეში დასრულდა. დღეს, ნინის და ირაკლის საერთო შვილი გოგონა, ელენე კუტალაძე ჰყავთ, რომელიც როგორც დედასთან, ასევე მამასთანაც ხშირად ატარებს დროს.