"ტოჩინოშინი" რამდენიმე წლის წინ ჩვენი ქვეყნისთვის რთულად წარმოსათქმელ, თუმცა საამაყო სახელად იქცა, მის უკან კი ქართველი სუმოისტი, 2018 წლის იმპერატორის თასის მფლობელი, კასუგანოს ჰეიას წარმომადგენელი ლევან გორგაძე დგას. ის მაყურებელმა გადაცემაში "ნოესთან" უფრო ახლოს გაიცნო, სადაც სპორტსმენმა ოჯახსა და შვილებზე ისაუბრა.
როგორც ცნობილია, ლევან გორგაძემ ცოტა ხნის წინ მეორედ იქორწინა და მეორე შვილი, ხარება შეეძინა. ტოჩინიშინმა 2016 წელს იქორწინა გოგონაზე, რომელიც მისი სკოლელი იყო. ორივე ძეგვში სწავლობდა და ერთმანეთიც იქ გაიცნეს.
"მე და ნინო სოფელში, ერთ სკოლაში ვსწავლობდით. ჩვენი სიყვარულის ისტორია მე-6 კლასში დაიწყო. შარშან გადავწყვიტეთ, გვექორწინა. ხელი მოვაწერეთ და ჩამოვიყვანე იაპონიაში. ქორწილი ტოკიოში გადავიხადეთ 31 იანვარს. ნინომაც საქორწინო კიმონო შეიძინა. ასე რომ, ორივემ კიმონოში გამოწყობილებმა ვიქორწინეთ...", - იხსენებდა ლევანი.
რამდენიმეწლიანი თანაცხოვრების შემდეგ ის მეუღლეს დაშორდა და იაპონელ ქალზე იქორწინა.
"ჩემი პირველი შვილი, დასამალი არაფერია, უჩემოდ იზრდება. ისე მოხდა, რომ ჩემი პირველი მეუღლე და მე ერთმანეთს დავშორდით. უკვე შვიდი წლის ხდება ჩემი შვილი და 2-ჯერ მყავს მარტო ნანახი. ალბათ, ყველაზე მეტად იმას ვაკლივარ.
ჩემს ყოფილ მეუღლესთან ურთიერთობა დაშორების შემდეგ დაძაბულია დღესაც. არ მაქვს ის ურთიერთობა, რომ შვილი მოვინახულო. ვეტყოდი, რომ ძალიან მიყვარს და მოვა ის დრო, დარწმუნებული ვარ, რაც მას დავაკელი ამ წლების განმავლობაში, თუ შევძელი, ავანაზღაურო.
ხარება არის 1 წლის. 20 აპრილს დაიბადა, შარშან. ისე მოხდა, რომ ჩემს მეუღლეს რომ დავშორდი, ამის შემდეგ აღმოჩნდა ჩემს ცხოვრებაში იაპონელი ქალბატონი ემი. აქ, იაპონიაში მეგობრული ბარიერი არის, რაც ჩვენთან არ არის.
ამიტომ რაღაცების გაგება ზოგჯერ ემის უჭირს. ჩვენ ყველაფერი ბევრი ვიცით, არის ურთიერთობაში ისეთი, რასაც ვერ იგებს. ქართველები რასაც ვაკეთებთ, ამათ ბევრი რამ ვერ წარმოუდგენიათ. მე შემიძლია ჩემი მეგობრისთვის ყველაფერი გადავდო და გვერდში დავუდგე და აქ ასე არაა. ამათ მსგავსი რამ არ წარმოუდგენიათ. რაც შეეხება ხარებას, ძალიან მაგარი ბავშვია, ცელქია. სკოლაში დაგვყავს, სკოლა არის ინგლისური, მე ქართულად ვესაუბრები, დედა ელაპარაკება იაპონურად და ბავშვი ვერ იგებს..." - ამბობს ლევან გორგაძე.
ტოჩინოშინის დებიუტი 2006 წლის მარტში შედგა, 2008 წლის მაისში კი მან მიაღწია მაკუუჩი დივიზიონს (პროფესიონალური სუმოს ექვსი დივიზიონიდან უმაღლესი) წამყვან პოზიციებს. მუხლის ტრავმის შედეგად გამოწვეული ხანგრძლივი პაუზის შემდეგ ტოჩინოშინი სუმოს 2014 წელს დაუბრუნდა და ასპარეზობა მაკუშიტა (მესამე დივიზიონიდან) დაიწყო. 2018 წელს ტოჩინოშინმა ჰაცუ ბაშო (იანვრის ტურნირში) 14-1 ბალანსით მოიგო და გახდა საიმპერატორო თასის მფლობელი.
ლევან გორგაძის შიკონა (სუმოს მებრძოლის პროფესიონალური ზედმეტსახელი) შედგენილია კასუგანოს სკოლის ტრადიციული პირველი თავსართისგან — „ტოჩი“ (რაც კასუგანო ბეიას - სკოლის, სადაც ტოჩინოშინი ასპარეზობს - მფლობელის წარმოშობის ადგილიდან, ტოჩის პრეფექტურიდან მოდის) და „შინი“ (გული).
გამარჯვება მას საქართველოს პრეზიდენტმა გიორგი მარგველაშვილმა და პრემიერ-მინისტრმა გიორგი კვირიკაშვილმა მიულოცეს. 2018 წლის ნაცუ ბაშოს (მაისის ტურნირი) შედეგების გათვალისწინებით, სუმოს ასოციაციამ ლევანი ოძეკის ტიტულზე წარადგინა, 30 მაისს კი ამ რანგის ოფიციალური გადაცემის ცერემონიალიც გაიმართა. 2024 წლის 4 თებერვალს ტოჩინოშინი სუმოდან გააცილეს. დაჯილდოებულია საქართველოს ღირსების ორდენით.