ცნობილი რუსი მომღერლის, ალა პუგაჩოვას ახლო ნათესავი რუსულ მედიასთან საუბრობს, რომ ვარსკვლავს ჯანმრთელობის სერიოზული პრობლემები აქვს. პროპაგანდისტული მედია წერს, რომ ალას ოჯახის ერთ-ერთმა წევრმა მისი ავადმყოფობის დეტალები გაამხილა.
წყაროს თქმით, უცხოეთში ექიმების შეცდომების გამო მისი მდგომარეობა დამძიმდა, ახლა კი მას ისრაელის საუკეთესო სპეციალისტებიც ვერ ეხმარებიან. ”ექიმები არ იცნობდნენ ალას სხეულის სპეციფიკას, რის გამოც მისი მდგომარეობა გაუარესდა. ექიმებმა ახლა განგაშის ზარი ატეხეს, მაგრამ მას ვერაფერს შველიან.“ - წერს მედია.
წყარო დასძენს, რომ დივას ნათესავები, რომლებიც რუსეთის ფედერაციაში დარჩნენ, შეშფოთებულნი არიან მისი ჯანმრთელობის მდგომარეობით და შიშობენ, პუგაჩოვას სიცოცხლეს საფრთხე ემუქრება.
ალა პუგაჩოვა საბჭოთა და რუსი ესტრადის მომღერალი, კომპოზიტორი-სიმღერების ავტორი, ესტრადის რეჟისორი, პროდიუსერი, კინომსახიობი და ტელეწამყვანია. დაიბადა 1949 წლის 15 აპრილს, არის 74 წლის.
კარიერა 1965 წლიდან დაიწყო. მის რეპერტუარში შედის 500-ზე მეტი სიმღერა რუსულ, ინგლისურ, გერმანულ, ფრანგულ, ებრაულ, ფინურ, უკრაინულ ენებზე, ხოლო დისკოგრაფია ითვლის 100-ზე მეტ სოლო-გრამფირფიტას (17 ალბომი, 34 სინგლი, 25 „კომპილაცია“ და კრებული). რუსეთისა და ყოფილი სსრკ-ის ქვეყნების გარდა, პუგაჩოვას ალბომები გამოიცემოდა იაპონიაში, კორეაში, შვედეთში, ფინეთში, გერმანიაში, პოლონეთში, ჩეხოსლოვაკიაში, ბულგარეთში. დისკების საერთო ტირაჟმა გადააჭარბა 250 მილიონ ეგზემპლარს. ალა პუგაჩოვამ წარადგინა რუსეთი "ევროვიზიის" სიმღერის კონკურსზე 1997 წელს.
პუგაჩოვა 5 წლიდან მუსიკით იყო გატაცებული. საშუალო სკოლის დამთავრების შემდეგ მან მოსკოვის იპოლიტე ივანოვის სახელობის მუსიკალურ სახელმწიფო სასწავლებელში სადირიჟორო-გუნდის განყოფილების განხრით განაგრძო სწავლა. პროფესიული სოლო-კარიერის დაწყებამდე ბევრ მუსიკალურ კოლექტივთან ერთად მუშაობდა. პირველი სიმღერა Робот დილის გადაცემისთვის შეიქმნა და მას დიდი წარმატება მოუტანა. სასწავლებლის დამთავრების შემდეგ რადიოსადგურის „ახალგაზრდობის“ ჯგუფთან ერთად, მომღერალმა დასავლეთ ციმბირში პირველი გასტროლები გამართა.
საერთაშორისო აღიარება 1975 წელს, ბულგარეთის საერთაშორისო კონკურსმა „ოქროს ორფეოსმა“ მოუტანა, სადაც მის მიერ შესრულებული სიმღერა „არლეკინო“ ერთხმად აღიარეს საუკეთესოდ და ალა პუგაჩოვას ფესტივალის გრან-პრი გადაეცა.
1979 წელს გამოვიდა ფილმი „ქალი, რომელიც მღერის“, რომელშიც მთავარ როლს ალა პუგაჩოვა ასრულებდა. საბჭოთა კინოგაქირავებაში ფილმმა 1979 წელს პირველი ადგილი დაიკავა, ხოლო ალა პუგაჩოვას, ჟურნალ „საბჭოთა ეკრანის“ გამოკითხვის შედეგების მიხედვით, მიენიჭა „წლის საუკეთესო მსახიობი ქალის“ წოდება. ფილმში გამოყენებულია სიმღერები, რომლებისთვისაც მუსიკა, ალექსანდრე ზაცეპინის გარდა, თავად ალა პუგაჩოვამაც დაწერა, „ბორის გორბონოსის“ ფსევდონიმით.
დღეისათვის ჩამოშორდა აქტიურ შემოქმედებით საქმიანობას. ჰყავს სამი შვილი და სამი შვილიშვილი. მისი ერთ-ერთი შვილი, კრისტინა ორბაკაიტე, აგრეთვე მომღერალია. პუგაჩოვა ამჟამად ქორწინებაში იმყოფება მაქსიმ გალკინთან.