" მამაჩემი გაგრაში დაიღუპა. მე და ჩემი ორი და დედამ მარტო გაგვზარდა" - ნანუკა ქაჯაია - Marao

ნანუკა ქაჯაია რამდენიმე წლის წინ გამოჩნდა ტელესივრცეში და ახლა ნახავთ ყველგან, სადაც ცხელ-ცხელი ამბები ტრიალებს. კვირაში 5 დღე სამსახურითა და რესპონდენტებით ცხოვრობს. განსაკუთრებით მოსწონს, როცა მოვლენების შუაგულში უწევს ყოფნა და ყველაფერი მის თვალწინ ხდება.

კარიერა

"31 წლის ვარ და აქედან 10 წელია, რაც ჟურნალისტი ვარ. თავდაპირველად ტელეკომპანია “იმედში” დავიწყე მუშაობა. სხვათა შორის, სტაჟირებაზე ნოდარ მელაძის რეკომენდაციით ამიყვანეს.

პირველივე დღეს მკითხა პროდიუსერმა, გადაღებაზე წავიდოდი თუ არა. ცხადია, ეს შესაძლებლობა ხელიდან არ გამიშვია. იმ დღეს ექვს გადაღებაზე ვიყავი. მთელი კვირა ამ რეჟიმში ვმუშაობდი. კვირის ბოლოს კი საინფორმაციოს უფროსმა, მათე კირვალიძემ, დამიძახა. არასდროს დამავიწყდება, როგორი შეშინებული შევედი მის კაბინეტში. მეგონა, რაღაც გავაფუჭე. მითხრა, მაინტერესებს, ვინ ხარ, სულ შენი გვარი მიწერია ე.წ. ვიორსტკაშიო და მომცა შესაძლებლობა, პირველივე კვირას გამეკეთებინა პირველი სიუჟეტი. ეს ეხებოდა სეზონურ ინფექციებს. მესამე წელს ითვლის, რაც “ტვ პირველში” ვმუშაობ.

არაფერი მაბედნიერებს ისე, როგორც მაყურებლის აზრი, მათი გამოხატული სითბო, მხარდაჭერა, გამხნევება. აი, მაგალითად, გადაღებაზე ხშირად სრულიად უცნობი ადამიანები მოდიან და იმდენ დადებით ემოციას მაძლევენ, რომ ყველაფერი მავიწყდება – დაღლაც, სიცივეც, ყინვაც. ვფიქრობ, მაყურებელს ძალიან განებივრებული ვყავარ და ამ ყველაფრით უბედნიერესი ვარ.

• "რაღაცები, რაც ძალიან პირადულია, მინდა ჩემთვის დავიტოვო?! ეს მხოლოდ და მხოლოდ მოფრთხილების, საყვარელ ადამიანზე მზრუნველობის გამო ხდება" - ვანიკო თარხნიშვილი 
• ნანი ბრეგვაძის სამი ასაკი: როგორ იცვლებოდა მომღერალი წლების განმავლობაში 

იცით, რა მახარებს ყველაზე მეტად? ჩემი იმედი აქვთ, რომ გვერდით დავუდგები და პრობლემების გადაჭრაში დავეხმარები. რა უნდა იყოს იმაზე კარგი შეგრძნება, როცა გენდობიან და შენი სჯერათ. უცნაური ზარებიც არის. აი, მაგალითად, დამირეკა ერთმა ქალმა, კარგი შვილი მყავს და რძლად მომწონხარო. მეორემ ადიგენიდან ჭაჭა ჩამომიტანა და დამპირდა, შემდეგ ჩამოსვლაზე კარტოფილი უნდა მოგიტანოო. ღვინოც კი მოუტანიათ კლინიკა “ვივამედთან”. ზოგი პოლიტიკაში წასვლასაც მთხოვს", - ამბობდა ნანუკა ქაჯაია. 

ოჯახი

ნანუკა ეკრანზე ყოველთვის ენერგიულია, ამბობენ და თავადაც აღიარებს, რომ ცხოვრებაში - კიდევ უფრო. მეგობრები ხშირად ეხუმრებიან, რომ საუბარს არასდროს ამთავრებს და სახალისო კადრებს ამაზე სოციალური ქსელის მის პირად გვერდებზეც გადააწყდებით. 

მუდამ ხალისიანი ნანუკას მიღმა არც ისე მარტივი ისტორიაა: 

"თბილისში ვიზრდებოდი, მაგრამ ჩვენ გაგრიდან ვართ. მამაჩემი იქ დაიღუპა. მე და ჩემი ორი და, მერი და ნატა, დედამ, მადონა ცომაიამ, მარტო გაგვზარდა. ვფიქრობ, რთული პერიოდის მიუხედავად, დედამ შეძლო, რომ უდარდელი და ბედნიერი ბავშვობა გვქონოდა სიყვარულსა და ბევრ სითბოში. სხვადასხვა წრეზე დავყავდით – სამსახიობოზე, ცეკვაზე, მუსიკაზე. სიმღერა საერთოდ არ გამომდის, მაგრამ მაინც ვმღერი.

რაც შეეხება დასვენებას, ზამთრის პერიოდში ეს იყო ბაკურიანი. მთელი დღე შემეძლო მესრიალა და არაფერი მახსოვდა. სხვათა შორის, ბავშვობაში ერთ-ერთი დაშვება კოხტაგორადან მოტეხილობით დავასრულე.

ზაფხულში ჯერ ზღვაზე ვისვენებდით და შემდეგ მთაში. სურამში დედას აუცილებლად ერთი თვით მივყავდით და მე და ჩემი დები სულ ვაპროტესტებდით. დედა არის ჩემი ყველაზე დიდი კრიტიკოსი და დიდი გულშემატკივარი. რჩევებს მაძლევს გარეგნობის თაობაზეც. მაგალითად, ყოველ დილით მთხოვს, წავისვა წითელი ტუჩსაცხი და გავიშალო თმა", - ამბობს ნანუკა ქაჯაია.

• "ძალიან ერთგული და სამართლიანი ვარ. არ მიყვარს ტყუილზე აგებული ურთიერთობები. მეგობრისთვის კი შემიძლია, შეუძლებელი გავაკეთო. ამიტომ მგონია, კარგი მეგობარი ვარ, თუმცა დროის დეფიციტს განვიცდი"

• "ჩემი გულის მოგება შეუძლია მას, ვინც არის ერთგული, ყურადღებიანი და მზრუნველი. ასევე უნდა იყოს საინტერესო, ჭკვიანი, მხიარული, კარგი იუმორის გრძნობით. ადრე ქერა ბიჭები მომწონდა, ახლა პირიქით, შავგვრემნები უფრო მომწონს"