"ყველგან გვხვდება სათაურები: “7-დღიანი დეტოქსი”, “დაიკელი 10 კგ. 2 კვირაში“ - თეონა ჩაჩუა ტრენდული დიეტებისა და წონის კლების შესახებ - Marao

"ჩვენ ვცხოვრობთ სამყაროში, სადაც ყველგან გვხვდება სათაურები: “7-დღიანი დეტოქსი”, “დაიკელი 10 კგ. 2 კვირაში“ და აშ . მაგრამ სიმართლე ისაა, რომ, ჩემს შემთხვევაში, 5 კგ-ს დაკლებას 2.5-3 თვემდე დასჭირდა.

ეს არ იყო სწრაფი პროცესი და არც მარტივი ყოფილა.

• "რამდენი წელი ვიცხოვრე ამ დაუსრულებელ ჯაჭვში, შიშსა და სირცხვილის განცდაში" - ეკა დემეტრაძე მენტალური ჯანმრთელობის შესახებ

მომიწია ძველი ჩვევებზე უარის თქმა და ყველაფრის თავიდან აშენება - შევცვალე არა მხოლოდ ის, რაც ჩემს თეფშზეა, არამედ ჩემი დამოკიდებულებაც. მომიწია დილით ადრე და ნებისმიერ ადგილას ვარჯიშისთვის მზადყოფნა მაშინაც კი, როცა მოტივაცია არ მქონდა. ბევრჯერ მქონია დღე, როცა ყველაფრის მიტოვება მინდოდა, რადგან სასწორი ციფრებს საკმარისად სწრაფად არ ცვლიდა.

მაგრამ გავაცნობიერე ერთი რამ: თუ მინდა შედეგი, რომელიც მართლა ჩემთან დარჩება, უნდა შემეწყვიტა სწრაფი შედეგების ძებნა და ცხოვრების წესის შეცვლაზე მეფიქრა. ეს აღარ არის მოკლევადიანი „გამოწვევა“ - ეს უკვე ჩემი ყოველდღიურობაა.

ნელი პროგრესიც პროგრესია", - წერს სოციალურ ქსელში ინფლუენსერი თეონა ჩაჩუა და წონის კლების საკუთარ გამოცილებას აზიარებს. 

არაჯანსაღი დიეტები და წონის სწორი კლების მნიშვნელობა თანამედროვე სამყაროში 

დღევანდელ ციფრულ ეპოქაში, როდესაც სოციალური ქსელები სავსეა "სწრაფი ტრანსფორმაციის" მომხიბვლელი დაპირებებით, ძალიან ადვილია არაჯანსაღი კვების ტრენდების მსხვერპლი გავხდეთ. ხშირად ის, რაც ერთი შეხედვით ეფექტურ და მარტივ გამოსავლად ჩანს, რეალურად ორგანიზმისთვის სერიოზული საფრთხის შემცველია.

• „სასიკვდილო დიეტა“ სოციალური ქსელებიდან: როგორ ვანადგურებთ ორგანიზმს მინერალური გაზიანი წყლითა და ლიმონით

ერთ-ერთი ყველაზე გავრცელებული შეცდომა მონოდიეტებია, რაც მხოლოდ ერთი კონკრეტული პროდუქტის (მაგალითად, წიწიბურის, ვაშლის ან კეფირის) მიღებას გულისხმობს. ასეთი მიდგომა იწვევს ვიტამინებისა და მინერალების მწვავე დეფიციტს, რაც ორგანიზმს ფიტავს.

არანაკლებ სახიფათოა კალორიების მკვეთრი შეზღუდვა. დღეში 800-1000 კალორიაზე ნაკლების მიღება ანელებს მეტაბოლიზმს, რადგან ორგანიზმი გადადის ე.წ. "შიმშილის რეჟიმში". შედეგად, როგორც კი ჩვეულ კვებას დაუბრუნდებით, წონა ორმაგად იმატებს - ამ მოვლენას სპეციალისტები "Yo-Yo ეფექტს" უწოდებენ.

გარდა ამისა, ხშირად ვხვდებით "დეტოქს" ჩაისა და გასახდომი აბების რეკლამებს. მათი უმეტესობა საფაღარათო საშუალებებს შეიცავს, რაც ცხიმის წვის ნაცვლად ორგანიზმის გაუწყლოებას და ელექტროლიტების დისბალანსს იწვევს. ასევე, ფართოდ გავრცელებული ტრენდია ნახშირწყლების სრული დემონიზაცია. ვინაიდან ნახშირწყლები ენერგიის მთავარი წყაროა, მათი რაციონიდან სრული ამოღება იწვევს მუდმივ დაღლილობას, გაღიზიანებადობას და საჭმლის მომნელებელი სისტემის დარღვევებს.

ჯანსაღი კლება არ ნიშნავს მხოლოდ სასწორზე ციფრების შემცირებას; ეს არის პროცესი, რომელიც ინარჩუნებს თქვენს ფიზიკურ და მენტალურ რესურსს. როდესაც წონას სწორად ვკარგავთ, ნივთიერებათა ცვლა არ ნელდება, რაც მიღწეული შედეგის ხანგრძლივად შენარჩუნებას აადვილებს.

სწორი კვების რეჟიმი გვეხმარება კუნთოვანი მასის შენარჩუნებაში, მაშინ როცა შიმშილობის დროს ორგანიზმი ენერგიის მისაღებად პირველ რიგში სწორედ კუნთს წვავს. განსაკუთრებით მნიშვნელოვანია ჰორმონალური ბალანსი - მკაცრი დიეტები ხშირად არღვევს ჰორმონულ ფონს, რაც პირდაპირ აისახება კანის, თმისა და ზოგადი ჯანმრთელობის მდგომარეობაზე. არ უნდა დაგვავიწყდეს ფსიქოლოგიური მხარეც: ჯანსაღი მიდგომა გამორიცხავს საკვებთან დაკავშირებულ მუდმივ დანაშაულის გრძნობას და "ჩავარდნებს".

უნდა გვახსოვდეს, რომ წონის კლების ოპტიმალური და უსაფრთხო ტემპი კვირაში საშუალოდ 0.5-1 კილოგრამია. თუ რომელიმე დიეტა ერთ კვირაში 5-10 კილოგრამის დაკლებას გპირდებათ, ეს ნიშნავს, რომ პროცესი არაჯანსაღია.

სწორი კვება მრავალფეროვანი უნდა იყოს და აუცილებლად მოიცავდეს ცილებს, ჯანსაღ ცხიმებსა და რთულ ნახშირწყლებს. ნებისმიერი რადიკალური ცვლილების წინ კი აუცილებელია კონსულტაცია სპეციალისტთან, რათა თავიდან ავიცილოთ ფარული დეფიციტები და ჯანმრთელობის შემდგომი გართულებები.