თაკო ნაცვლიშვილი ჯეიმს ჰარვი-კელის ობიექტივში: ქართველი მოდელის ახალი ფოტოები - Marao
თაკო ნაცვლიშვილი ჯეიმს ჰარვი-კელის ობიექტივში: ქართველი მოდელის ახალი ფოტოები
ნაცვლიშვილების ცნობილი ოჯახი საქართველოში ყოველთვის საზოგადოების განსაკუთრებული ყურადღებითა და სიყვარულით სარგებლობს. ამ ოჯახის ერთ-ერთი ყველაზე კაშკაშა წარმომადგენელი, თაკო ნაცვლიშვილი, უკვე წლებია საერთაშორისო სამოდელო ასპარეზზე წარმატებით საქმიანობს და მსოფლიოს წამყვან მოდის სახლებთან თანამშრომლობს.
თაკო აქტიურია სოციალურ ქსელებშიც, სადაც მას ასობით ათასი გამომწერი ადევნებს თვალს. მოდელი ხშირად უზიარებს გულშემატკივრებს კადრებს როგორც პირადი ცხოვრებიდან, ასევე პროფესიული გადაღებებიდან. ამჯერად, მან გამომწერებს ცნობილი ფოტოგრაფის, James Harvey-Kelly-ის მიერ გადაღებული ახალი ფოტოსესიის კადრები გაუზიარა.
ჯეიმს ჰარვი-კელი ცნობილია თავისი განსაკუთრებული ხელწერით, სადაც ბუნებრივი განათება, ელეგანტურობა და კინემატოგრაფიული კადრები ჭარბობს. ქართველი მოდელისა და ბრიტანელი ფოტოგრაფის თანამშრომლობით შექმნილი ფოტოები სწორედ ამ დახვეწილი სტილით გამოირჩევა.
თაკო ნაცვლიშვილი
თაკო ნაცვლიშვილ დაიბადა 1998 წლის 9 ოქტომბერს, თბილისში. თაკოს დედა ნინო ცქიტიშვილი "მის საქართველო 1997"-ის ტიტულის მფლობელი და საქართველოში ერთ-ერთი ყველაზე წარმატებული სააგენტოს, Look Models-ის დამფუძნებელია. მისი მამა კი წარმატებული კალათბურთელი ვატო ნაცვლიშვილია.
თაკოს კარიერა 16 წლის ასაკში დაიწყო, გადამწყვეტი მომენტი კი მაშინ დადგა, როდესაც ხელშეკრულება გააფორმა რამდენიმე პრესტიჟულ საერთაშორისო სამოდელო სააგენტოსთან, რამაც საშუალება მისცა განევითარებინა თავისი შესაძლებლობები საქართველოს საზღვრებს გარეთ. საერთაშორისო კამპანიებმა იგი გააცნო გლობალურ სცენას, სადაც მუშაობდა ცნობილ დიზაინერებთან და ბრენდებთან. წლების განმავლობაში ის იქცა მოდის სახლებისა და დიზაინერებისთვის მოთხოვნად მოდელად.
თაკოს კარიერა ნელ-ნელა ვითარდებოდა, მალე დაიწყო გამოსვლა მსოფლიოს ყველაზე მნიშვნელოვან მოდის კვირეულებზე, მათ შორის ნიუ-იორკში, მილანში, პარიზსა და ლონდონში. ამან საერთაშორისო სცენაზე გააძლიერა მისი, როგორც მოდელის სტატუსი და თაკო მალე გახდა ფავორიტი ცნობილ დიზაინერებსა და ფოტოგრაფებს შორის.
კარიერის დასაწყისში მისით ერთ-ერთი ყველაზე პრესტიჟული საერთაშორისო სამოდელო სააგენტო Next Models-ი დაინტერესდა, რომელთანაც მალევე გააფორმა კონტრაქტი. სწორედ ამ კონტრაქტის გაფორმებას მოჰყვა მისი თანამშრომლობა ისეთ დიდ ბრენდებთან, როგორებიცაა: "ვერსაჩი", "არმანი", "ელი სააბი", "რალფ & რუსო", "ზუჰაირ მურადი", "დიორი", "ჩალაიანი", "იამამოტო" და სხვ.
Victoria’s Secret ის შოუ მოდის სამყაროს ერთ-ერთი მნიშვნელოვანი მოვლენა იყო. შოუზე რამდენიმე მიწვეული მოდელია, მონაწილეების ნაწილს კი კონკურსით არჩევენ, კასტინგი ნიუ-იორკში იმართება. პირველი მცდელობა თაკო ნაცვლიშვილის 2017 წელს ჰქონდა, როცა ფინალურ ეტაპამდე მიაღწია, თუმცა, საბოლოოდ, შოუსთვის არ შეარჩიეს. მის ნაცვლად Victoria's Secret-ის 2017 წლის გრანდიოზულ შოუში Dilone-მა მიიღო მონაწილეობა.
თაკო ნაცვლიშვილმა 2023 წლის 27 მაისს რჩეულზე, ოთო ხუროძეზე იქორწინა. თაკომ და ოთომ ქორწილი იტალიაში, ქალაქ რომში გადაიხადეს. ჯვრისწერა San Salvatore ai Monti-ში, ქართულ ეკლესიაში შედგა. წვეულება და ხელის მოწერა კი ლაციოში, Castello Orsini-Odescalchi-ში გაიმართა. ცერემონიას ოჯახის წევრები და მეგობრები ესწრებოდნენ. თაკოს ამერიკელი დიზაინერის, Vera Wang-ის უმშვენიერესი კაბა ეცვა. მშვენიერი პატარძლისა და ულამაზესი ქორწილის შესახებ კი დიდი ხნის მანძილზე საუბრობდნენ.