„8 წელი უსასრულობამდე“ - ყველაზე სკეპტიკურად შეფასებული წყვილის 8-წლიანი მყარი სიყვარული - Marao
„8 წელი უსასრულობამდე“ - ყველაზე სკეპტიკურად შეფასებული წყვილის 8-წლიანი მყარი სიყვარული
ჯასტინ და ჰეილი ბიბერებისთვის სექტემბერი განსაკუთრებული თვეა, წყვილმა ქორწინების მერვე წლისთავი აღნიშნა. 32 წლის პოპვარსკვლავმა და 29 წლის მოდელმა ეს მნიშვნელოვანი დღე საკმაოდ მშვიდ, თუმცა რომანტიკულ გარემოში გაატარა და სოციალურ ქსელში თბილი სიტყვების დაწერასაც არ მოერიდა.
ჯასტინმა იუბილესთან დაკავშირებით ინსტაგრამზე რამდენიმე ფოტო გამოაქვეყნა, სადაც ის და ჰეილი ერთად ბილიარდს თამაშობენ.
„8 წელი უსასრულობამდე, ახალი დასაწყისები. მიყვარხარ, საყვარელო. გილოცავ იუბილეს“, - წერს ჯასტინი.
სიყვარულის ისტორია
ჯასტინისა და ჰეილის ურთიერთობა ქორწილამდე გაცილებით ადრე დაიწყო. ისინი ერთმანეთს ჯერ კიდევ ახალგაზრდობაში იცნობდნენ, მოგვიანებით კი მათი ურთიერთობის შესახებ პირველი ხმები 2014 წელს გავრცელდა. 2016 წელს წყვილმა ურთიერთობა საჯაროდაც დაადასტურა, თუმცა მათი გზა ყოველთვის მარტივი არ ყოფილა, ისინი გარკვეული პერიოდი დაშორებულებიც კი იყვნენ.
2018 წელი კი მათი სიყვარულის ისტორიაში გარდამტეხი აღმოჩნდა. დაშორების შემდეგ ჯასტინი და ჰეილი კვლავ დაახლოვდნენ, ურთიერთობა სწრაფად განვითარდა და იმავე წლის ივლისში წყვილი დაინიშნა. სულ რამდენიმე თვეში კი მათ კიდევ ერთი მოულოდნელი ნაბიჯი გადადგეს.
საიდუმლო ქორწილი ნიუ-იორკში
2018 წლის 13 სექტემბერს ჯასტინი და ჰეილი ნიუ-იორკის სასამართლოში მივიდნენ და იქორწინეს. მათი ქორწილი იმდენად მოულოდნელი იყო, რომ თავდაპირველად წყვილი საკუთარ სტატუსს საჯაროდ არ ადასტურებდა. მოგვიანებით კი ჯასტინმა ჰეილის „ჩემი ცოლი“ უწოდა და მათი ქორწინება უკვე ყველასთვის ცნობილი გახდა.
თუმცა ეს მათი ერთადერთი საქორწილო ცერემონია არ ყოფილა. ერთი წლის შემდეგ, 2019 წლის სექტემბერში, წყვილმა სამხრეთ კაროლინაში დიდი, ვარსკვლავური ქორწილი გამართა, რომელსაც მეგობრები და ოჯახის წევრები ესწრებოდნენ.
მშობლის ამპლუაში
ჯასტინისა და ჰეილის ურთიერთობაში კიდევ ერთი მნიშვნელოვანი ეტაპი 2024 წელს დადგა. წყვილს პირველი შვილი, ვაჟი ჯეკ ბლუზ ბიბერი, შეეძინა. მას შემდეგ ისინი პერიოდულად უზიარებენ გულშემატკივრებს ოჯახური ცხოვრების კადრებს, თუმცა შვილის პირადი სივრცის დაცვას განსაკუთრებულ ყურადღებას აქცევენ.
ჰეილიმ ამ წლების განმავლობაში საკუთარი კარიერაც მნიშვნელოვნად განავითარა და Rhode-ის დამფუძნებლად იქცა, ჯასტინი კი მუსიკალურ კარიერას აგრძელებს. მიუხედავად მუდმივი ყურადღებისა და მათი პირადი ცხოვრების გარშემო არსებული ინტერესისა, წყვილი ბოლო წლებში უფრო ხშირად გვაჩვენებს ჩვეულებრივ, ოჯახურ და ნაკლებად პომპეზურ მომენტებს.
მათი მერვე იუბილეც სწორედ ასეთი აღმოჩნდა, ბილიარდი, სიცილი და ერთმანეთისთვის მიძღვნილი რამდენიმე თბილი სიტყვა.
