მსახიობმა ანა ტყებუჩავამ „პირველი სტუდიის“ ეთერში პირად ცხოვრებასა და მეუღლის, ლევან ბარამიძის მიმართ საკუთარ დამოკიდებულებაზე გულწრფელად ისაუბრა. მან გაიხსენა პერიოდი, როდესაც მეუღლეს საქმის გამო ხშირად უწევდა მივლინებებში გამგზავრება, და აღნიშნა, თუ როგორ უჭირდა მასთან დროებითი განშორება.
„ლევანს ბევრი მივლინება უწევდა. იმ დროს შემართებით ვიყავი, შენ გარეშე ყველაფერს გავუმკლავდები-მეთქი, ლევანსაც ვაწონებდი თავს, ჩემს თავსაც ვუმტკიცებდი რაღაცას და სამყაროსაც. რაღაც მომენტში მივხვდი, რომ ეს ჩემთვის ძნელი იყო. რა თქმა უნდა, მას არაფერს ვუშლიდი, მაგრამ ეს უნდა მეთქვა. უნდა მეთქვა, რომ ჩემთვის მისი გამგზავრება სევდიანი იყო. და ეს კარგია, რადგან სხვანაირად არც უნდა იყოს,“ - ამბობს ანა

ანა ტყებუჩავა 1983 წლის 30 სექტემბერს დაიბადა. მსახიობი ტელეეკრანებზე პირველად სერიალ „შუა ქალაქში" ირაკლი ექიმის სტუდენტის როლში გამოჩნდა. თუმცა, საზოგადოების აღიარება და სახელი მაინც რეიტინგული სერიალის „ჩემი ცოლის დაქალების" მთავარმა გმირმა ნინამ მოუტანა.
"ეს როლი მაშინ მომცეს, როცა 22 წლის ვიყავი. თან ბავშვი შემეძინა და ეს წლები ბევრ ემოციას უკავშირდება. გარდა იმისა, რომ გავხდი პოპულარული, ჩემი ცხოვრება შეიცვალა. გამიმართლა იმაშიც, რომ ამ ჯგუფში მოვხვდი. ამასთანავე, ძალიან შეიცვალა საზოგადოების დამოკიდებულება - პოპულარობა და სიყვარული მოვიდა, რომელიც ძალიან მნიშვნელოვანია. ამიტომ ვამბობ, რომ აუცილებლად გაგრძელდება სერიალი და უფრო მნიშვნელოვანი პროექტებიც უნდა იყოს, მეტი და უკეთესი შესაძლებლობების გამოსახატად.
ჩვენი სერიალი არის აბსოლუტურად ქართული, ქართულ სინამდვილეს ასახავს. ეს ყველაფერი ჩემთვის ძალიან ძვირფასია. "ჩცდ"-ს ყველანი "პირველ შვილს“ ვეძახით და მისი წარმატება სიყვარულია, რაც ამ ყველაფრის დიდი გამართლებაა. კი, ჩემი როლიც მთავარია. ჩემს გმირს, რა თქმა უნდა, თანავუგრძნობ, ბევრ რაღაცაშიც არ ვეთანხმები, მაგრამ ლოგიკურად მესმის მისი..." - ამბობდა ანა.
ანას თქმით, მეუღლე, რეჟისორი ლევან ბარამიძე მის ცხოვრებაში სწორედ მაშინ გამოჩნდა, როდესაც ორი ახლო მეგობარი დაკარგა და მძიმე პერიოდი ჰქონდა.
„ჩვენ ოჯახში ძალიან ხმაურიანი ხალხი ვცხოვრობთ, დედა გურულია და მამა - მეგრელი. მეც ასეთი ვარ, მაგრამ ლევანი ძალიან წყნარია, არავის აწუხებს ისე აკეთებს ყველაფერს. ამიტომ მისი გამოჩენა ჩემთვის დიდი სიმშვიდის მომტანი იყო, ისე მივეკარი, თავად, მგონი, არც გეგმავდა სერიოზულ ურთიერთობას. არ მომწონს, ძალიან მოლაპარაკე და აქტიური მამაკაცები. დინჯი, სიტყვაძუნწი კაცები უფრო მომწონს და ჩემთვის ეს უფრო საინტერესოა.
ლევანი რომ გავიცანი, იმ პერიოდში ორი მეგობარი გარდამეცვალა. რთული პერიოდი იყო, ავარიით დაიღუპნენ. ამბობენ, დრო მკურნალიაო, მაგრამ იცით, როგორი წამები მქონდა, როგორც კი თვალს ვახელდი, მახსოვდა, რომ ისინი აღარ იყვნენ და არ ვიცოდი, როგორ შეიძლება გამეგრძელებინა ცხოვრება. ეს ჩემი მშობლებისთვისაც ძალიან მძიმე დარტყმა იყო“, - ამბობდა ანა.
წყვილს ორი ულამაზესი ქალიშვილი ჰყავს. როგორც სოციალური ქსელებით ირკვევა, ანა და მისი მეუღლე ლევანი შვილებთან ერთად ხშირად მოგზაურობენ.