ნარატივები შავ-თეთრში: როგორ იქმნებოდა მოდის ისტორია - Marao
ნარატივები შავ-თეთრში: როგორ იქმნებოდა მოდის ისტორია
1989 წლის ნოემბრის ერთ თბილ კვირა დილას, მოდელების მცირე ჯგუფი ნიუ-იორკის ცენტრში, ერთ-ერთ ქუჩაზე შეიკრიბა. British Vogue-ს ხუთი სუპერმოდელი, სინდი კროუფორდი, კრისტი ტარლინგტონი, ლინდა ევანგელისტა, ნაომი კემპბელი და ტატიანა პატიცი – ერთად მოეყვანა, რათა გერმანელ ფოტოგრაფ პიტერ ლინდბერგს ისინი ჟურნალის 1990 წლის იანვრის ნომრის გარეკანისთვის გადაეღო.
ქრისტიან ჰაუტენბოსი, რომელიც ამ გადაღებაზე თმის სტილისტად მუშაობდა, იხსენებს, რომ ლინდბერგი "თბილი, თუმცა მტკიცე" მიდგომით ცდილობდა, "უკიდურესად განსხვავებული ხასიათის" მქონე ხუთივე ქალი კამერის წინაშე გაეერთიანებინა. რბილი დამარწმუნებელი ტაქტიკით, ლინდბერგმა და მოდის სტილისტმა ბრანა ვულფმა შეძლეს შეექმნათ კადრი, რომელიც მოდის ფოტოგრაფიის ისტორიაში გარდამტეხ მომენტად იქცა.
როგორც ჩანს, სანამ ნომერი ბეჭდვაში ჩაეშვებოდა, British Vogue-ის გუნდმა უკვე იცოდა, რომ ხელთ რაღაც განსაკუთრებული ჰქონდათ. გვერდის საპირისპიროდ, რომელიც მკითხველს "საუკუნის ქალს“ წარუდგენდა, ჟურნალმა გამოაქვეყნა რუბრიკა "გარეკანი შექმნის პროცესში". აქ ასახული იყო კულისებს მიღმა გადაღებული ფოტოები – თუ როგორ მუშაობდა ლინდბერგი და როგორ ეხვეოდნენ მას სიყვარულით მოდელები. ეს იყო ისტორია, რომელიც მათ თვალწინ იწერებოდა.
სინდი
როდესაც ენერგიული 80-იანი წლები დასასრულს უახლოვდებოდა, British Vogue-მა სინდი კროუფორდი დედამიწის მეორე მხარეს, ინდოეთის შორეულ პროვინცია ლადახში გაგზავნა ფოტოგრაფ პატრიკ დემარშელიესა და მოდის რედაქტორ ლუსინდა ჩემბერსთან ერთად. დემარშელიეს ნამუშევრები – როგორც ადგილობრივი სოფლის მცხოვრებთა ყოველდღიურობის ამსახველი კადრები, ისე კროუფორდის მოდის ფოტოები – ერთდროულად ინტიმურიცაა და დრამატულიც. კროუფორდი გვევლინება ქალად, რომელიც უცხო მხარეში მოგზაურობს, თუმცა, ამავდროულად, სრულ ჰარმონიაშია გარემომცველ ლანდშაფტთან.
შემდეგი გადაღება კვლავ მოგზაურობას უკავშირდება. ამჯერად, იდუმალი და პროვოკაციული ფოტოების სერიისთვის, კროუფორდი US Vogue-ის ყოფილ კრეატიულ დირექტორ ანდრე ლეონ ტალისა და ლეგენდარულ ფოტოგრაფ ჰელმუტ ნიუტონს შეუერთდა სიუჟეტისთვის "ვენერა მონაკოდან“.
ფოტოები გადაიღეს მონტე-კარლოში, სადაც ნიუტონი მრავალი წლის განმავლობაში ცხოვრობდა, და ეს იყო პირველი შემთხვევა, როდესაც ნიუტონმა და კროუფორდმა ერთად იმუშავეს. ნიუტონმა, Vogue-ის ერთ-ერთმა ყველაზე ნაყოფიერმა და საზღვრების დამანგრეველმა ფოტოგრაფმა, სრულიად შეცვალა წარმოდგენა იმის შესახებ, თუ სად და როდის შეიძლება საცურაო კოსტიუმის ტარება, და თავად კროუფორდის იმიჯიც ხელახლა შექმნა. როგორც თანმხლებ ტექსტში ეწერა: "ჰელმუტ ნიუტონი პირველად უღებს ფოტოს სინდი კროუფორდს და მას ტიპური ამერიკელი "მეზობლის გოგონადან" რივიერას ქალღმერთად გარდასახავს".
ნაომი
სტატიაში, სახელწოდებით „შემჭიდროებული კემპბელი“, British Vogue-ის ყოფილმა მთავარმა რედაქტორმა ალექსანდრა შულმანმა 2002 წლის აგვისტოს ნომერში სუპერმოდელებს შორის ყველაზე სკანდალურ ნაომი კემპბელთან გულახდილი ინტერვიუ ჩაწერა. კემპბელი სულ ახლახან გამოსულიყო სარეაბილიტაციო ცენტრიდან, გადაეტანა დაშორება და კვლავ ლონდონურ გამოცემა The Mirror-თან გახმაურებული სასამართლო დავის ეპიცენტრში იმყოფებოდა.
ინტერვიუს თანმხლებ ფოტოებზე კორინ დეიმ – 90-იანი წლების დასაწყისის გრანჟის ეპოქის ალბათ ყველაზე გავლენიანმა ფოტოგრაფმა – კემპბელი პარიზის ერთ-ერთ ბინაში გადაიღო, რომელსაც მისი სტილისთვის დამახასიათებელი, დახვეწილი სიძველის ელფერი დაჰკრავდა. სტილისტმა ქეით ფელანმა კემპბელს ადრეული 70-იანი წლების იმიჯი მოარგო, მათ შორის პარიკი, რომელიც 70-იანი წლების ფილმების ვარსკვლავის, პემ გრიერის სტილს აცოცხლებდა. კემპბელი ფოტოებზე ერთდროულად ძლიერიც ჩანს და მოწყვლადიც, თავდაჯერებულიც და, რა თქმა უნდა, საოცრად ლამაზიც.
ოცდაერთი წლის შემდეგ, ჩვენ კვლავ ვხედავთ კემპბელს პარიზში. ამჯერად, იგი US Vogue-ისთვის ენი ლეიბოვიცმა გადაიღო, როგორც ჟურნალის 2023 წლის მაისის ნომრის ნაწილი, რომელიც კარლ ლაგერფელდის ხსოვნას მიეძღვნა. კემპბელს ხელში თავდაჯერებულად უჭირავს ლაგერფელდის საყვარელი კატა შუპეტი და აცვია სამოსი Balmain-ის უახლესი კოლექციიდან, რომელიც ოლივიე რუსტენმა შექმნა. მისი იმიჯი სამხედრო ფორმის ასოციაციას იწვევს, ხოლო მის უკან მდგარი ღია Aston Martin-ი გაფიქრებინებთ, რომ კემპბელი თანამედროვე 007 აგენტია, რომელიც, ალბათ, ახლახან დაედევნა ბოროტმოქმედს ხიდიდან. კემპბელის სილამაზე უცვლელი რჩება, მისი ხასიათის სიმტკიცე კი მხოლოდ გაიზარდა.
კრისტი
US Vogue-ის 1989 წლის დეკემბრის ნომრისთვის, ფოტოგრაფმა სტივენ მაიზელმა კრისტი ტარლინგტონი ნამდვილ კინოვარსკვლავად აქცია. ფოტოსესიაში "La Dolce Vita", რომლის სტილზეც კარლინ სერფ დე დუდზილმა იზრუნა, ტარლინგტონი ბრწყინვალებას ასხივებს და იტალიელი კინოდივას სრულ აურას გადმოცემს. თანმხლები ტექსტი ხაზს უსვამდა, რომ ტარლინგტონი ამ როლისთვის შეუდარებელი იყო: "ყველაზე ეფექტური და ექსტრავაგანტური ბრილიანტების ფონზე: კრისტი ტარლინგტონის გლამურული, კინოვარსკვლავური სტილი".
მაიზელის უნარი, დაიჭიროს ფოტოგრაფსა და მუზას შორის არსებული ინტიმურობის ხანმოკლე მომენტი და, ამავდროულად, შეინარჩუნოს უზომო გლამური, არის ერთ-ერთი მიზეზი, რის გამოც იგი ათწლეულზე მეტი ხნის განმავლობაში გახდა US Vogue-ისა და Italian Vogue-ის წამყვანი ფოტოგრაფი.
"ახლა ეს ყველაფერი ძალიან შორს მეჩვენება" – ასე აღწერს კრისტი ტარლინგტონი თავის წარსულ სამოდელო ცხოვრებას. 2002 წლისთვის ტარლინგტონს უკვე დაწერილი ჰქონდა წიგნი იოგაზე და დაარსებული ჰქონდა იოგას სამოსის ხაზი „Nuala“. სხვა სუპერმოდელებთან ერთად დაუსრულებელი წვეულებების დღეები წარსულს ჩაბარდა. Vogue-ის სალი სინგერი ტარლინგტონს სწორედ ამ ამბის დასაწერად შეხვდა სტატიისთვის, რომელსაც მართებულად ეწოდა „მეომარი ერთი“. ფოტოგრაფმა სტივენ კლაინმა და US Vogue-ის მოდის დირექტორმა ტონ გუდმენმა კი ჟურნალის გარეკანისთვის ტარლინგტონის სრულყოფილ პოზას დამატებითი გლამური შემატეს
ლინდა
ლინდა ევანგელისტამ ერთხელ ცნობილი ფრაზა თქვა, რომ "დღეში 10 000 დოლარზე ნაკლებად ლოგინიდანაც არ ადგებოდა", თუმცა British Vogue-ის 1991 წლის მაისის ნომრისთვის ევანგელისტა ამერიკის სამხრეთ-დასავლეთის უდაბნოში აღმოჩნდა პიტერ ლინდბერგთან და მოდის რედაქტორ ლუსინდა ჩემბერსთან ერთად. სიუჟეტში "ბონი და კლაიდი", რომელიც ცნობილ კრიმინალურ წყვილს ეფუძნებოდა – ევანგელისტა თავის კოლეგა სუპერმოდელ კარენ მიულდერთან ერთად გადაიღეს.
ლინდბერგი მოდის ინდუსტრიაში ნარატივების შექმნისა და შავ-თეთრ ფერებში ბრწყინვალე კონტრასტების პოვნის დიდოსტატი იყო. ევანგელისტას შავი პალტო და ქუდი სრულ კონტრასტშია მის მკვეთრ თეთრ ზედასთან, ქერა თმასა და მის გარშემო არსებულ უდაბურ ლანდშაფტთან.
ორი წლის შემდეგ, ევანგელისტა ჩინეთში ჩავიდა ამ სფეროს ორ ლეგენდასთან – ფოტოგრაფ არტურ ელგორტსა და US Vogue-ის კრეატიულ დირექტორ გრეის კოდინგტონთან ერთად. როგორც ელგორტი იხსენებს, მას გაუჩნდა იდეა, გადაეღო ევანგელისტა, რომელიც ტრადიციულ ჩინურ ნავზე იდგა, თუმცა ნავის მფლობელმა გააფრთხილა, რომ მის ნავზე ვინმეს ფეხზე დგომა თითქმის შეუძლებელი იყო. ელგორტმა ევანგელისტას ჰკითხა, შეძლებდა თუ არა ამას. მოდელმა მყისვე მიუგო: „ეს მთელ გვერდზე გაიშლება?“ ელგორტმა დაარწმუნა, რომ ასე იქნებოდა. ევანგელისტა ნავზე ავიდა და დანარჩენი უკვე ისტორიაა.
