მეგან მარკლის გამოჩენა, რომელმაც მოდის კრიტიკოსები აღაფრთოვანა: შემოდგომის დახვეწილი ლუქი ბრიტანული ბრენდებისგან - Marao
მეგან მარკლის გამოჩენა, რომელმაც მოდის კრიტიკოსები აღაფრთოვანა: შემოდგომის დახვეწილი ლუქი ბრიტანული ბრენდებისგან
მეგან მარკლი და პრინცი ჰარი საზოგადოებაში ერთად გამოჩნდნენ. სასექსის ჰერცოგი და ჰერცოგინია 15 ოქტომბერს დიდ ბრიტანეთში, ქალაქ ნოტინგემში იმყოფებოდნენ, სადაც რამდენიმე საქველმოქმედო ორგანიზაციას ეწვივნენ. წყვილის ერთობლივი გამოჩენა განსაკუთრებული ყურადღების ცენტრში მოექცა, თუმცა არანაკლები ინტერესი მეგან მარკლის ჩაცმულობამაც გამოიწვია.
ჰერცოგინიამ ამ დღისთვის უპირატესობა ბრიტანულ ბრენდებს მიანიჭა და შემოდგომის სეზონისთვის დამახასიათებელი, შინდისფერი და იისფერი ტონების დახვეწილი კომბინაცია შეარჩია. მისი ლუქი მინიმალისტური, ელეგანტური და თანამედროვე იყო.
მეგან მარკლის მონოქრომული ლუქი
მეგანმა ლონდონური ბრენდის, Joseph-ის, ყავისფერი ტონის მაღალყელიანი ნაქსოვი ზედა და შესაბამისი ქაშმირის პალტო მოირგო. სამოსს The Fold London-ის ქლიავისფერი, საშუალო სიგრძის ქვედაბოლო შეუხამა, ხოლო ლუქი Jennifer Chamandi-ს შინდისფერი მაღალქუსლიანი ფეხსაცმლით დაასრულა.
აქსესუარებიდან ყურადღებას Joseph-ის მუქი ყავისფერი, ნაქსოვი ტყავის ჩანთა და Marks & Spencer-ის თაფლისფერი ქამარი იქცევდა. ჰერცოგინიამ სამკაულებიც შეარჩია, მათ შორის ოქროსფერი დეტალები, რომლებიც მთლიან ანსამბლს ჰარმონიულად ერწყმოდა.
მეგანის ჩაცმულობაში განსაკუთრებით შესამჩნევი იყო შემოდგომის აქტუალური ფერების - შინდისფრის, მუქი ყავისფრისა და ქლიავისფრის შეხამება. განსხვავებული ტონების მიუხედავად, ლუქი ერთიან და დახვეწილ შთაბეჭდილებას ქმნიდა.
ნოტინგემი - ქალაქი, რომელსაც წყვილისთვის განსაკუთრებული მნიშვნელობა აქვს
მეგან მარკლისა და პრინცი ჰარის ვიზიტი მხოლოდ საზოგადოებაში გამოჩენით არ შემოიფარგლებოდა. წყვილი ეწვია Community Recording Studio-ს, რომელიც ახალგაზრდებს მუსიკისა და შემოქმედებითი საქმიანობის მიმართულებით განვითარებაში ეხმარება. მათ ასევე მოინახულეს Himmah Hub, ორგანიზაცია, რომელიც სიღარიბისა და საკვების დეფიციტის პრობლემებზე მუშაობს, და Epic Partners, რომელიც ახალგაზრდებს სპორტული პროგრამებისა და მენტორობის საშუალებით უჭერს მხარს.
ნოტინგემს წყვილის ისტორიაში განსაკუთრებული ადგილი უკავია. სწორედ ამ ქალაქში შედგა მათი პირველი ერთობლივი ოფიციალური საჯარო გამოჩენა 2017 წელს, ნიშნობის გამოცხადებიდან მალევე. თითქმის ცხრა წლის შემდეგ დაბრუნება ამ ვიზიტს დამატებით სიმბოლურ მნიშვნელობას სძენდა.
მეგანი და ჰარი ადგილობრივებს შეხვდნენ, მათთან ფოტოები გადაიღეს და ყვავილების თაიგულებიც მიიღეს. ერთ-ერთ გულშემატკივართან საუბრისას ჰერცოგინიამ აღნიშნა, რომ დაბრუნება ძალიან უხაროდა.