"14 წელი ერთად და კიდევ ბევრი წინ გველის“ - ოჯახური ტრადიცია, რომელიც წლებს უძლებს - Marao

მუსიკოს გიგი დედალამაზიშვილისა და ფოტოგრაფ მარინა კარპის წყვილს ქართველი საზოგადოება კარგად იცნობს და უყვარს. 

გიგი ქართველმა მსმენელმა ჯგუფ „მგზავრებთან“ ერთად გამოჩენისთანავე შეიყვარა. ჯგუფის მიერ შექმნილი მუსიკა და ენერგეტიკა წლებია ქართველი და არა მხოლოდ ქართველი მსმენელის გულს იპყრობს, თუმცა გიგის ცხოვრებაში მუსიკასთან ერთად უმნიშვნელოვანესი ადგილი მის ოჯახს უკავია.

დღეს მარინა და გიგი ქორწინების 14 წლის იუბილეს აღნიშნავენ. ამ მნიშვნელოვან თარიღთან დაკავშირებით წყვილმა სოციალურ ქსელში 14-წლიანი ფოტოალბომი გამოაქვეყნა, სადაც მათი ერთად გავლილი გზაა.

წყვილს წლების წინ ჩამოყალიბებული არაჩვეულებრივი და ემოციური ტრადიციაც აქვს - ისინი ყოველ ქორწინების წლისთავს შვილებთან ერთად მცხეთაში აღნიშნავენ და თან წინა წელს გადაღებულ ფოტოს ატარებენ, რაც დროის სვლასა და ოჯახის ზრდას კიდევ უფრო თვალსაჩინოს ხდის.

„ეს ჩვენი დღეა. ყველა აღმართისა და დაღმართის მიუხედავად, ჩვენი საყვარელი ტრადიცია უბრალოდ ოჯახთან ერთად ყოფნაა. 14 წელი ერთად და კიდევ ბევრი წინ გველის“, - წერს მარინა სოციალურ ქსელში და წყვილის გულშემატკივრებისგან ათასობით მილოცვას იღებს.

• "მე მისთვის ქალიშვილი ვარ, ციცი კი ჩემთვის ძალიან ახლო მეგობარია" - მარინა კარპი ოჯახისა და დედამთილის შესახებ 

გიგი დედალამაზიშვილი და მარინა კარპი

გიგი დედალამაზიშვილისა და მარინა კარპის წყვილს სოციალურ ქსელში კარგად იცნობენ. გიგი საზოგადოებამ წლების წინ შეიყვარა, როცა ის სცენაზე კოლეგებთან ერთად მუსიკალური ჯგუფის, "მგზავრების" შემადგენლობაში გამოჩნდა. გიგის დედა, ციცი ფალავანდიშვილი ასევე მუსიკოსია და გიგის ეს ნიჭი მემკვიდრეობით ერგო. დედას რომ გიგის ცხოვრებაში განსაკუთრებული ადგილი აქვს, ამაზე მას არაერთხელ უსაუბრია: "ვგრძნობ, რომ ვარ დედაჩემის ნაწილი, მისი გაგრძელება... ჩემთვის დედა ყველაფერია...დედაჩემი მკაცრი არასდროს არ ყოფილა, ყოველთვის ჩემი მეგობარი იყო, ამისთვის მას დიდი მადლობა... რომ არა დედაჩემი, ჩემი ცხოვრება ასე ფერადი არ იქნებოდა" - ამბობდა გიგი.

• 16 წელი ერთად: "ერთმანეთი კიევში, მეგობრის დაბადების დღეზე გავიცანით - რატომღაც, ზუსტად იმ დღეს ვთქვი, რომ ჩემი მომავალი ქმარი უნდა მეპოვა" 

რაც შეეხება მარინა კარპის, ის უკრაინელი ფოტოგრაფია. გიგიმ და მარინამ საკუთარი სიყვარულის ისტორიის შესახებ საჯაროდ არაერთხელ ისაუბრეს. წლების წინ გიგიმ და მისი ჯგუფის წევრებმა სარისკო გადაწყვეტილება მიიღეს, უარი თქვეს სტანდარტულ სამსახურში მუშაობაზე და მუსიკალური კარიერის ასაწყობად უცხო ქვეყანაში წავიდნენ. შრომისა და, რა თქმა უნდა, ცოტა იღბლის წყალობით, ისინი სწორ დროს სწორ ადამიანებს შეხვდნენ და ახალგაზრდა ბიჭებმა ხალხის სიყვარული მალევე მოიპოვეს. ამის პარალელურად, გიგიმ ცხოვრების მთავარი სიყვარულიც სწორედ უკრაინაში იპოვა - იქ გაიცნო მარინა, რომელიც მას საქართველოში გამოჰყვა. მარინა აღნიშნავს, რომ ფოტოგრაფიით მას შემდეგ დაინტერესდა, რაც სკოლა ოქროს მედალზე დაამთავრა, მაგრამ სწავლა არსად გაუგრძელებია. 16 წლიდან მოყოლებული, ფოტოგრაფიის ყველა მნიშვნელოვანი კურსი მოიარა კიევში და შემდგომ 24-საათიანი სამუშაო გრაფიკი ჰქონდა.„16-დან 20 წლამდე ჩემმა ცხოვრებამ ყოველდღიურ გადაღებებში ჩაიარა და უცბად, ბრახ! – მე მას შევხვდი. გიგიმ თავი შემაყვარა, საკუთარი ნებით ჩავხტი ტომარაში და გავფრინდი საქართველოში. 2011 წლიდან ჩემი ცხოვრება ორ ქალაქს – თბილისსა და კიევს შორისაა გადაშლილი. საქართველოში ყველაფერი მიყვარს, იმიტომ, რომ გიგისთანაა კავშირი. ტრადიციები, ხალხი... გიგის მეგობრები უკვე ჩემი მეგობრები არიან. თავს სახლში ვგრძნობ... გიგის ფეთქებადი ხასიათი არ მომწონს, მაგრამ ამის გარეშე არ წარმომიდგენია", - ამბობდა მარინა.