„90 კილოდან 68 კილომდე“ - სალომე შარვაძე გამომწერებს წონის დაკლების, კვების რაციონისა და თავის მოვლის საიდუმლოებებს უზიარებს - Marao
„90 კილოდან 68 კილომდე“ - სალომე შარვაძე გამომწერებს წონის დაკლების, კვების რაციონისა და თავის მოვლის საიდუმლოებებს უზიარებს
მსახიობი, ტელეწამყვანი და ინფლუენსერი სალომე შარვაძე სოციალურ ქსელში გამომწერების მხრიდან მიღებულ უამრავ კომპლიმენტს ეხმაურება და საკუთარი გარდასახვის გზასა და ჯანსაღი ცხოვრების წესზე გულახდილად საუბრობს.
როგორც სალომე აღნიშნავს, წონის კლების პროცესი სამედიცინო ჩარევითა და ენდოკრინოლოგის მეთვალყურეობით დაიწყო, დღეს კი შედეგის შენარჩუნებას ჯანსაღი კვებითა და ფიზიკური აქტივობით აგრძელებს.
სამედიცინო ჩარევა და პირველი ნაბიჯები
„დაახლოებით ერთი წლის წინ გავიკეთე სრული გამოკვლევა და აღმოჩნდა, რომ ჩემი BMI, ანუ ორგანიზმში ცხიმის ინდექსი, საკმაოდ მაღალი იყო. გადაწყდა, რომ დანიშნულებით უნდა ჩართულიყო ენდოკრინოლოგი და დამენიშნა სპეციალური კვება და ინიექცია, რომელიც პირდაპირ დამეხმარებოდა წონის კლებაში,“ - იხსენებს მსახიობი.
მისი თქმით, ინიექციის კურსი უკვე დასრულებულია და ახლა მთლიანად ჯანსაღ რეჟიმზეა გადასული:
„ახლა უკვე შეწყვეტილი მაქვს. ვაგრძელებ უბრალოდ ჯანსაღ კვებას, ბევრ ცილას. ახლა უკვე ვიწყებ ვარჯიშს, კუნთები მინდა ტონუსში მოვიყვანო.“
22 დაკლებული კილოგრამი და ახალი მიზნები
შედეგი მართლაც შთამბეჭდავია - სალომემ 22 კილოგრამის დაკლება შეძლო, თუმცა დასახული მიზნისკენ სვლას მშვიდი ტემპით აგრძელებს:
„90 კილოდან ახლა 68 კილო ვარ. კიდევ მინდა 5 კილო, მაგრამ არსად არ მეჩქარება; ნელ-ნელა ვიცი, რომ ამ წონასაც დავიკლებ.“
კვების რაციონი, წყლის ბალანსი და თავის მოვლა
სალომე გამომწერებს საკუთარი ყოველდღიური რაციონისა და თავის მოვლის ჩვევების დეტალებსაც უზიარებს. მისი თქმით, მთავარი აქცენტი ცილოვან პროდუქტებსა და სითხის მიღებაზე კეთდება:
- ცილოვანი კვება: „მივირთმევ ბევრ ცილას; ეს იქნება კვერცხი, ქათმის ხორცი, თევზი თუ ასე შემდეგ. ესეც გაწერილი მაქვს.“
- წყლის მიღება: „რა თქმა უნდა, წყალი - დღეში 2 ლიტრი ყველაზე ცოტა, ხოლო 2.5–3 თუ დავლიე, ხომ გადასარევი ამბავია.“
- აქტივობა: „ბევრი ფეხით სიარული“
გარდა წონის კლებისა, ყურადღების ცენტრში მოექცა მისი სახის კანიც. მსახიობი აღნიშნავს, რომ კანის სილამაზესა და ჯანმრთელობაზე ზრუნვას მომავალშიც გეგმავს:
„რაც შეეხება სახის კანს - ჰო, საკმაოდ კარგად გამოიყურება... რაღაც-რაღაცებს გავიკეთებ სახეზეც, რომ ჩემი სახის კანი ლამაზად იყოს.“
სალომე შარვაძის გამოცდილება კიდევ ერთხელ უსვამს ხაზს იმას, რომ წონის ეფექტური და უსაფრთხო კლება სწორ სამედიცინო მეთვალყურეობასა და ჯანსაღი ცხოვრების წესის დამკვიდრებას ეფუძნება.